2017年4月2日 星期日

recolte 日本小家電 ~ CotoCoto日式電飯煲(附做法:慢煮蕃茄醬忟牛肋條)

真係忍唔住喇,
以我咁鍾意試新嘢嘅性格,
睇到萬O有recolte小家電換購,
忍到今日先走去換其實已經係好遲,
日式小電鍋已經冇晒貨,
不過見到CotoCoto日式電飯煲幾得意,
就換佢啦~~

包裝盒都已經吸引到我

配件唔多,飯勺、防燙夾、蒸盤,全部細細件

另外附送食譜,有成40個餸,印刷好精美

分為:基本模式(BASIC)和慢煮模式(SLOW)



回到家乜都唔做煮落飯先,
用咗一杯日本米試用,
睇咗說明書加水就煮得飯好似好方便喎。
我煮日本米係冇事先浸米,
洗完就跟煲內嘅指示加米水,
按下基本模式(BASIC) 40分鐘就煮好。
煮出黎嘅飯比較濕,下次要減水,但食落都唔錯,抵讚。



煮好飯又試下用慢煮模式(SLOW),
見到有牛肋條、洋蔥、紅蘿蔔、蕃茄醬、雞湯,
就試下慢煮牛肋條。
用了2小時煮.......

見到屋企有乜就煮乜啦~~哈哈~~

牛肋條先出水,再把所有材料放晒入去
(留意要在電飯煲內膽先加入200cc水)

加入半樽蕃茄醬和少許雞湯(冇雞湯可用水代替)

按下慢煮模式(SLOW)2小時
中途我加咗1次水

煮好喇

雖然今次都係是旦煮,但出黎效果好好喎,
炆得好淋呀,唔駛加鹽已經夠晒咸。

真係幾好玩,
細細部又方便收藏,
我又要動動腦筋設計下食譜先得~~

睇下可唔可以換埋日式小電鍋,
有再同大家分享下用後感啦~~








歡迎大家上Bullbull自家廚房留言比我 Pls click~~

bullbull-facebooks

2016年8月15日 星期一

BRUNO Hot Plate 多功能電熱鍋 ~ Rice Burger 米漢堡

之前V仔個post有提到我會介紹一下最近在日本非常hit嘅BRUNO Hot Plate多功能電熱鍋。
不過因為小朋友放暑假, 實在冇時間慢慢寫blog, 
不過我又真係好想同大家分享,
啱啱自己又入咗個新模,不過就先介紹哩個模先啦,
遲啲先再寫其他模嘅用法。

BRUNO真係好正,
正嘅程度係我會放在最容易拎嘅地方,
一拎就可以用。
以前用過類似款TEFxx,
但都冇哩個咁好,
火力夠而且均勻。

因為係日本買,
當然要拖牛,
所以我已經長期放了隻牛在旁邊方便隨時用。

今次哩個模係有六個圖格,
最適合做rice burger。
不過今次因為冇出街買生菜,所以我改用雞蛋(乘機可以試下煎蛋),
成品同街係冇分別。

我今次煮了一杯米(用泰國金鳳米),
先濕手再把已攤凍嘅飯搓成圖型,
再放入已加熱至High和掃油嘅模內, 
用匙(要濕水,唔係會痴到阿媽都唔認得)大力壓扁。
先煎好一邊,另一邊就掃Teriyaki sauce。
因為見到仲有兩個空位所以打多兩隻蛋加料。(順便試下煎蛋好唔好用)


反轉又再掃Teriyaki Sauce在另一邊
 記得雞蛋都要反㗎!
煎至金黃色就拎出放在碟上。

轉用平底模,放入洋蔥和紅蘿蔔絲絲炒至軟身,
在另一邊加少許油放入牛肉(牛肉先加入少許鹽和黑胡椒粉醃片刻),
炒到熟就再加入少許Teriyaki sauce(約2 Tbsp,視乎咸度啦)
炒勻後放在碟上。


跟住進行併合,
我自己先放蛋再掃sauce,
跟住加入洋蔥和紅蘿蔔絲,
再到牛肉。

阿仔食咗一啖話點夠可以咁正㗎?
同街一樣咁好味。
我自己會將佢地唔多like嘅蔬菜放埋入去,
佢地兩個不知不覺間就食晒落肚。

係唔係好容易整呢?
我下次會自己做漢堡牛肉,
嗰模嘅size剛剛好,
你話幾多用途呢!
我會慢慢發掘啲新用法~~
諗下都覺得好開心~~

唔記得講啲蛋好得,
就算我反都唔容易穿,
煎完似足M記嘅水準。





歡迎大家上Bullbull自家廚房留言比我 Pls click~~

bullbull-facebooks

2016年7月19日 星期二

Vitantonio 鬆餅機~ 杯子蛋糕模式(附食譜)

好感謝Vitantonio公司送了一個蛋糕模給我~
因為哩個模實在好可愛,全香港都賣斷市!

可以一次過焗8個迷仔cupcake~~
咪睇好似好細個,一啖一口就啱啱好。
而且做法好簡單,
真係用好短時間就做到,
同小朋友一齊做又方便,
有時間唧埋icing cream仲靚呀!

要熱咗個pan先好掃油呀,牛油或植物油都冇所謂。
我喜歡放把麵糊放入唧袋再唧入模內,用匙冇咁好㗎。


大約焗3分半至4分鐘

個面好靚仔,冇凹陷,唔唧cream就咁當蛋糕仔食都見得下人~(哈哈)

同大家share個食譜先:

雞全蛋 2隻(中size)
低筋粉(蛋糕粉)100g
糖 75g
牛油 (室溫軟)100g
泡打粉 Baking powder 1g

做法:
1. 把室溫放軟的牛油用手提打蛋器略打散,加入糖,打至變奶白色。
2. 先把蛋拂勻,逐少加入(1)內,打至均勻。
3. 最後把已篩好的低筋粉和泡打粉加入麵糊內,改用人手攪勻。
4. 放在室溫約15分鐘才用。
5. Vitantonio預熱,掃油,加入麵糊,焗約3分半至4分鐘。
6. 記得要即時拿出,放涼。(可用串燒幼身鐵針拮在蛋糕側,放便拿出)
7. 隨自己喜好唧上icing cream和裝飾。

下期預告:試用BRUNO多功能電熱鍋(日本版)

足料西班牙海鮮飯

焗麵包
仲有大板燒、煎牛扒...... (要用努力寫先得)







歡迎大家上Bullbull自家廚房留言比我 Pls click here~~

bullbull-facebooks

2016年7月18日 星期一

Natalie豎琴日誌~ 參加2016年第七屆法國豎琴大賽勇奪冠軍

真係耐到唔記得上次嗰篇喺幾時寫,
唔係我想懶,而係太太太忙,
已經忙到連身體都出現問題,
經過了三個月的休養先好啲......

上次提到阿女已經成功在同年10月考到了四級,
考級其實除咗練琴外,亦練習耐性,
試諗下要你個幾月彈同樣嘅歌真係會好悶,
所以每個小朋友考級唔駛理pass唔pass都應該要比掌聲佢地!!!

考完四級後並沒有因此而放鬆。
阿女開始參加香港舉辦嘅豎琴比賽,
吸取多啲臨場經驗。
第一場已經係大賽~第三屆香港豎琴大賽。
雖然第一次參加,但佢完全冇怯場,
睇番評審仲讚佢比現好...

12月份,豎琴老師提議想阿女參加2016年2月份在法國舉辦嘅豎琴大賽。
我都好有疑問,佢唔係學咗好耐(都係一年多),會唔會太急?!
老師解釋話阿女一定冇問題,因為佢好勤力,心理質素也不錯(不容易受外界影響)。
好啦,既然老師都咁講,我同Natalie爸爸就決定支持到底!
又係一樣,同一首歌大約連續練了一個多月就去比賽。
今次由我帶Natalie去,Natalie老師都有一齊,
去到法國我當然好似個阿四咁要照顧阿女啦。
最辛苦係時差,一落機就要再轉約4小時火車到Limoges,
去到已經傍晚6點,是旦食碗杯麵,七點就開始要練習。
Natalie其實都幾辛苦,因為當時已經係香港凌晨2點,
佢練到想瞓著......但仍然堅持住
練了一小時我帶佢就返酒店沖涼瞓覺,
我當然仲未有得休息啦,因為翌日下午佢就要比賽,
我要預備好所有用品先可以休息呢!!(哩個阿四唔易做)
好彩小朋友適應時差好快,瞓飽已經夠晒精神比賽~~
可憐佢阿媽我仲係好似隻熊貓咁對眼黑過墨斗~~

今次阿女嘅對手有17人, 來自世界各地,
佢係第二位細個(最細那個細佢半個月),
見到佢上台毫無懼色,彈得比練習嗰陣更好呢!
到頒獎禮,但因為係用法文,
我同老師都唔了解佢拎到第幾名,
哈哈......要麻煩當地識英文嘅負責人解釋我地知原來係得到大獎:評審一致頒發冠軍
開心死我地呢!!!!
辛苦得到回報了~~

出外比賽能夠令到Natalie可以見識到出面嘅世界有幾大,
吸取更多台上經驗,遇到問題要如何自己解決,
這些是用錢也學不到的經驗。

而家同大家分享一下當日比賽嘅片刻。






阿女,未來要加緊練習呀!!
努力去追尋你的豎琴之夢~~

2016年3月21日 星期一

Bosch Series 8 oven ~ 烤雞配薯角 (附食譜)

好耐冇寫食譜了,
忙住小女嘅學業和興趣班~
不過哩個食譜又真係幾唔錯,
忍唔住要同大家分享下(^^)

今次係用Donna Hay(一位來自澳洲的烹飪家)的食譜,
她的食譜出名容易和快捷,
但就好難買到,因為太搶手了~~
我就喺個blog介紹比大家啦。

我煮嘅係用上Smoked paprika煙辣椒粉醃雞,
完全唔會覺得辣,反而食落仲會有一種好似BBQ的感覺。
就算我個女佢食都冇問題,一個人食咗成隻雞肶。
阿Do話幾惹味。

我用了一隻1.3kg(連頭,但會切去唔用)全雞,
Smoked paprika煙辣椒粉可以在大型超市買到,
Thyme就用自己種,夠晒新鮮,如果冇都可以在超市買到。


smoked paprika powder

烤雞配薯角


(食譜改良自Donna Hay)
材料:
全雞一隻 1.3kg
smoked paprika 2tsp
Thyme leave 2tsp (要把葉從葉徑拔出)
海鹽 1.5tsp
粗粒黑椒粉 1/2tsp
植物油 2Tsp
薯仔細size 2個

做法:
1. 把雞洗淨,抹乾,備用。
2. 把smoked parika、Thyme leave、海鹽、黑椒粉和油混合攪勻。
3  均勻地塗在雞腔和表面, 把隻綁好,放入雪櫃最少醃5小時,隔夜更好。
4. 留意焗前要把雞拿出放在室溫一小時。
5. 焗前把薯仔去皮,再切角型,把雞醃後流出(2)的醃汁均勻撈好薯角。(唔會好多汁但足夠撈勻薯角)
6. Bosch Series 8 oven 使用4D火,預熱200度。
7. 先在焗盤鋪上錫紙,輕輕掃一層薄油,放上薯角焗10分鐘,再放入雞焗35至40分鐘。
完成。
8. 拿出後要先放一陣才切,否則肉汁便會流出。


值得encore~~
下次去BBQ,一定會醃隻去燒~~






歡迎大家上Bullbull自家廚房留言比我 Pls click~~

bullbull-facebooks

2015年12月9日 星期三

我的新焗爐~ Bosch Series 8 oven 嵌入式焗爐

我一路都好想要嵌入式焗爐,
但廚房個洗衣機太過襟用,
點都唔肯退休,
我唯有一等再等.......(頸都長咗幾吋)
不過雖然要等,我都一直有留意各大公司新出嘅焗爐。
到咗今年8月,
比我睇到一部香港仲未出嘅焗爐~Bosch Series 8 oven
一般焗爐都係3D風,佢地就出到4D風。
一次過焗幾層,風力都會好平均。
而且仲多咗個叫PerfectBake嘅功能,
唔係好識煮嘢食嘅人就咁放入麵糊入去會自動探測烤焗嘅溫度,
你話幾方便呢!(不過我就唔多需要哩個功能)
就係咁啱,
睇中哩部機後,洗衣機退休喇...
我嘅理想終於達到。
不過我都要在此多謝阿Do嘅全力支持,
唔係邊有咁pro嘅機用喎!

講番部機嘅function, 仲有個燒烤全面積/燒烤集中,
如果想只係焗表面金黃色,例如:白汁意粉,
可以好短時間就焗好,超方便。
而我買嘅型號仲有埋一支肉針溫度捧,
不過之前冇用開,所以而家要不斷試......
連續三日試焗豬柳嘅溫度,食足三日。(哈哈)

另外哩個爐唔單止可以焗,仲可以純蒸,
蒸大魚完全冇問題啦, 
聽講如果唔中途開門,
可以蒸到三小時。(我未有時間試)
不過值得讚係去到100度用嘅時間好短,
當蒸完仲可以按一個制就幫你烘乾番部機(10分鐘),
真係抹都慳番。

而家先睇下部焗爐到我家情況~

到貨喇,一盒係焗爐,另一盒係贈品。

送貨和安裝分兩日進行,師傅們都好快手呢!

由於換了洗衣機才可以騰出空間安裝Bosch Series 8。
阿Do一聽到我想要嵌入式焗爐就即刻搵師傅重新整過個櫃。(抵錫)
水波爐當然會保留啦,因為實在好好用嘛!


師傅仲幫我喺側面整咗個架,可以方便我放焗盤(啲焗盤和蒸盤都超大個)

贈品包括一套三件Silit高級廚具,
當然都係made in Germany。
個pan又係超好用,
熱鍋落油,炒嘢唔痴底。

首先開爐係用咗17小時低溫發酵嘅吐司。


4D熱風用180度焗30分鐘,攪掂。
留意個介面好靚仔又清楚,
一目瞭然,雖然第一次用,
都好快上手,冇大問題。

有彈性!放幾日都唔會硬。

又試下焗春雞,
金黃色,皮脆肉嫩。

到Wellington Beef

上色好均勻,牛肉粉紅色...好吸引

自創嘅黑松露醬炒蘑菇夾豬柳。
第一次用肉針,用170度焗至70度(肉心),
發覺嚡咗啲。



加埋蘆筍和忌廉汁就大功告成。

第二日我改了65度,第三日就62度,食落啱啱好...
用肉針真係好方便,想幾熟都得,
唔駛擔心太厚或太薄焗出黎唔熟或過熟。

用叉燒嘅醃法去醃雞肉,
又係焗得好靚。

就係哩個功能/燒烤集中(小範圍),好快就焗起,慳電呀!

到日式疏乎厘芝士蛋糕,顏色平均!

之前用了春雞太細隻唔夠食,今次改用三黃雞,
用香草醃,最好味...居然係雞下面嘅雜菜和薯仔...入晒味呀!!(哈哈)

焗咖哩排骨都好掂


不過我多數會用airfryer,今次因為試機先用大爐。

有少少辣,好惹味。

由發酵(30﹣50度)到焗,
同水波爐一樣,一機攪掂晒,
極方便。
漲卜卜嘅菠蘿飽,一出爐冇咗4個~~

低溫發酵山形吐司又黎~~
(因為趕住要第二次發酵,所以放麵糰放得唔夠平均,樣有啲衰,其中一座山塌咗少少)

我又跟番ABC嘅食譜做蒜蓉包,
不過溫度就要較低10度。

點少得試馬卡龍呢!
要試清楚爐溫先可以做得好嘛,
但馬卡龍往往係最難攪,
第一次失敗了,
買了新盤再試就成功。

先用4D熱風30度吹10分鐘至表面乾,(但我第二次要烘18分鐘先乾,唔明?)
preheat170度,
入爐轉用160度焗12分鐘。

因為減少咗吹乾嘅時間,做馬卡龍變得簡單容易好多。
另外由於4D熱風,
每次可以同一時間焗幾盤,
可以大量起貨...(哈哈...可以做生意喇~~)

海鹽焦糖餡,好味!

唧得平均,好容易就放到入盒內~~


囡囡已經落咗order要送比好朋友和老師,
我做好一舊都冇得食呀><"

隔咗一日, 我又開壇再做,
今次做兩種口味,
係阿女要求做白朱古力味道,
今次好啲我分得一粒,
其他要送比同學仔為大家考試加油打氣喎...

唔夠分,所以每人送3粒

等我再upload下啲新相先~~
焗最好就係有剩下火,以前水波爐都冇㗎,
Series 8 就有,
焗好咗個面,再轉用下火焗底,
個批會脆好多㗎~~

粟米煙三文魚批大功告成!
做過咁多次焗批,今次真係最脆~~
得15cm,唔夠食呀,下次起碼要double先夠一家人分。

買咗QQ粉做朱古力麻糬波波,用4D熱風,200度15分鐘有得食。



估唔到自己咁勁,短短兩個星期已經試咗做咁多嘢,(有啲冇影相)
其實我仲有好多嘢未煮㗎,
slow cook function都未用,
要再努力啲先得!!


**由於新機實在有太多功能喇,
本說明書好長,
我要多啲時間睇同埋試機,
遲啲再同大家分享啦~~
(多謝大家用咗咁多時間睇我個blog)**









歡迎大家上Bullbull自家廚房留言比我 Pls click~~

bullbull-facebooks