Toshibo 水波爐～ 日式疏夫厘芝士蛋糕（附食譜）

因為先前太忙喇，
小朋友學校又要換季，
我又要執番啲冬天衫...
忙到一頭煙，
所以食譜遲遲都冇時間寫呀。（唔好意思要大家久等)
今晚終於有時間坐定定寫~~~

今次日式疏夫厘芝士蛋糕係從網上找到的。
自已試過覺得非常唔錯，
另外再比過好多人試都讚好味。
材料好簡單：白朱古力、cream cheese、雞蛋， 焗盤用 15cm

做法亦好簡單...
我家工人姐姐都好鍾意我做哩款蛋糕㗎...因為佢可以洗少好多嘢。 (爆笑）

白朱古力120g （超市買到）

先用熱水座溶

Cream cheese 120 g 

雞蛋3隻（中size) 

（蛋白和蛋黃請先分開）

cream cheese先用機攪軟（太硬好難同白朱古力混合）

如果已經係室溫軟就唔駛再攪

把已經軟嘅cream cheese加入白朱古力內一齊攪

完成可以拿出（不用繼續座熱）

放入3隻雞蛋黃再攪勻。 

餘下3隻蛋白打成蛋白霜，用機打至起角。

先把1/3蛋白霜加入麵漿內攪至八成，

接著加入碗內嘅1/2再攪至八成，

最後放晒全部。

攪勻就好停喇，過份攪拌會令空氣漏走，蛋糕就會升唔起。

預先已預熱170度， 

放入蛋糕，再在焗盤上加入熱水，要多啲，太少好快會乾晒。

焗15分鐘。

跟住轉160度再焗15分鐘。

最後關火後，不要即時拿出，再等15分鐘先好拿出。 

登登登...登......攤凍後再灑防潮糖霜。

另外雪凍食都好好味㗎～～

大家都試下啦～～

歡迎大家上Bullbull自家廚房留言比我～～

Brod & Taylor 發酵箱 ～ 香腸包、小餐包、咖喱包

有留意開我個blog嘅朋友仔，

一定有見過我幾個月前曾介紹過B﹠T發酵箱～～

Pls click

而家天氣開始涼了，

做包發酵嘅時間又長咗，

係時候入番部幫下自己啦～～（笑）

有時做包我都會用Miele stream oven 40度發酵，（最低係40度）

不過今次用日本白神酵母，

最佳發酵溫度係35度，

啱啱Brod & Taylor可調較嘅溫度可以 由21至49度，

哈哈......35度無難度啦～～

今次我一個麵糰做咗三款包：

香腸包、小餐包、咖喱包

搓包之前砌好部機。

水放在中間附送嘅細盤內。（好少水就夠）

白神酵母就用35度發酵啦。

如果普通即溶酵母就40度最適合。

今次係手搓麵糰～～

攪好麵糰直接放入去， 

因為係透明，所以放咗入去睇已經好清楚。

發到兩倍大就可以可以拎出黎。 （40分鐘）

做好造型之後，又再放入去作第二次發酵。

今次發20分鐘。

其中一個我做咗咖喱包，（炸包）

另外四個做腸仔包（雪櫃剩番4條香腸咋），

同三個小餐包。

用Toshibo 水波爐焗190度12分鐘。

顏色好靚呀～～

媽咪今日上黎睇做包，

佢見到部機都讚不絕口，

話收藏容易。

哈哈哈...睇黎我都要買部送比佢做生日禮物～～

大家有興趣直接打去ACE KITCHEN LTD

搵Frankie Chu (Tel:60174957)
佢會好詳細解答到大家嘅問題～～

歡迎大家上Bullbull自家廚房留言比我～～

AirFryer - 蝦醬焗春雞（附食譜）

AirFryer - 蝦醬焗春雞（附食譜）

文章日期：12/07/2012 12:15 am

今次焗嘅蝦醬焗春雞真係勁勁勁香呀！！！我醃完之後，成間屋都香得好緊要，連我個仔喺房都走出黎問我整緊乜冬冬？
雖然有蝦醬，但食落又唔係話咁重味，但又出奇地好鬼死夾喎～～

睇吓係唔係好金黃呢？焗起如果即時食真係皮脆㗎，不過因為要等埋阿Do放工，已經唔脆，但味道一樣咁好～～小朋友都好鍾意食㗎～～

材料：

甘荀絲毫 1隻 （細size)

洋蔥絲半個 

紅酒 1/4杯

雞湯 1/2杯

醃料：

黑椒粉 1/2tsp

辣椒粉 1/8tsp

蒜粉 2tsp

百里香 1tsp

蝦醬 2大tsp

生抽 2tsp

鹽 1tsp

生油 1Tsp

做法：

1. 先把所有醃料撈勻，再搽在雞的內外，約三小時。

2. 把洋蔥絲和甘荀絲毫炒香，塞入雞的肚內，再用針拮實。

3. 用錫紙封雞的翼尖以防焗燶。

4. Airfryer preheat 180度（5mins)，焗約25mins。（中途要反轉）

汁的做法：

5. 把在雞肚內的洋蔥絲和甘荀絲拿出。

6. 用pan加少許油，把洋蔥絲和甘荀絲充份炒香，再加入紅酒，取後加入雞湯，煮成燒汁。最後把渣隔出。

心得：自己在最後幾分鐘要特別留意雞的表面，因好容易會焗燶。

阿Do食完話一定要再encore，等我遲啲再買隻雞返黎再焗比佢嘆吓先～～ 

歡迎大家上Bullbull自家廚房﹣Private kitchen留言比我～～

CCS at 12/12/2012 05:31 pm comment

HI GLORIA, 你好, 今日發現你這BLOG 真係好開心, 因為我想試這新產品好耐, 只是未見有人用過後的 COMMENT, 不知是否真的咁好用, 現在見你成隻春雞都炸到咁靚, 當堂信心大增, 請問此機清洗容易嗎? 還有什麼地方要特別留意? 多謝你的解答和分享, 我會再細看你各篇網誌食諳的. 並恭喜你創作的食譜獲獎呀, 好叻女

CCS at 12/17/2012 02:37 pm reply

多謝你, 易清潔好緊要, 我最怕似焗爐咁難抹又要舖鍚紙, 好麻煩

beandogsnow at 12/12/2012 10:58 pm reply

多謝你呀，我自己都好surprise可以入到final，我同仔仔都會努力～～ 其實我都只係用咗Airfryer半年，不過用落真係幾好，又方便又快捷。講到清洗問題，我自己去十二蚊店買咗個鋼絲擦（好似牙擦款），專係擦個網，其他易潔部份就係用海棉洗。只要係用完之後用水浸一陣，會容易洗好多。不過頂部發熱線，就唔可以用洗潔精洗，只能用半濕布抹。每次用完抹一下，焗嗰陣就唔會出咁大油煙。

Yolanda at 12/07/2012 07:36 pm comment

每次見到你的 blog 都流哂口水呀

beandogsnow at 12/08/2012 12:01 am reply

呵呵呵.....咁你就要多啲入黎睇喇～～

Natalie豎琴日誌（第一至三堂）

囡囡轉眼間已經三年級了～～ （我又老咗喇～～） 

開學已經三個月，

功課亦比以前忙...(多到令我頭痛（−＿−；））

見到佢有時讀到好辛苦真係幾慘。

所以我一路都係比佢上啲佢有興趣嘅課外活動去減壓，

例如：畫畫、跳芭蕾舞、鋼琴。

但其中有一項課外活動我一路都唔比佢玩...就係豎琴。

豎琴其實係好難學㗎！

因為係用手指撥絃，所以會好痛...唔止痛仲會脫皮。

我就係擔心佢怕痛而三分鐘熱度...所以唔比佢學。

而且學豎琴嘅學費都幾貴㗎...（荷包會好傷）

不過今次見佢好有決心想學，

而且比佢試堂後，

老師嘅意見係佢嘅手指好適合彈，

手指夠長，指頭有肉，指甲又唔係生得好出。

加上佢讚囡囡專注力強，記憶力好，

令我更有信心比佢試下。

除咗第一堂試堂我可以入去全程睇， 

之後正式堂我只可以最後5分鐘入去，

遲啲就冇得聽。

聽落好似唔多好...又唔知個女學成點？又唔知佢應該練習啲乜？

但老師解釋我知，

唔係個個學生嘅家長都冇得入，主要係睇番小朋友

由於佢覺得阿女可以handle到，

而且比佢自己試，唔駛依賴媽咪幫手，

咁會學得快啲。

不過我似終都有啲唔放心，

所以練琴嘅第一次，

我暫時都會跟埋入去聽（我自己鋼琴底所以聽音冇問題）

跟住就由囡囡自己練。

由於囡囡仲細，而且仲係初學，

每次只可以彈半小時，（手指仔頂唔住）

一個星期上一堂加埋練習兩堂，加埋都係個半鐘。

遲少少就可以加多一堂練習即一共兩個鐘。

因為都係啱啱開始學，

唔會買琴住，

但我都有問老師一啲簡單資料，

再上網睇下......真係唔得了......要成三萬五千幾蚊（仲要係做緊特價）

如果唔肯定囡囡係唔係長期有心機學，

都係去琴行練住琴先。

不過每次車程連埋練習都要個半鐘呀...

非常浪費時間！！

屋企有琴就可以慳好多時間。

唉...真係兩難呀...

我都問過租琴，

大約都要成千蚊一個月...... 

二手琴都唔平......

我仲未諗掂條數呀。

唔理咁多，

再過幾個月先諗啦～～

先睇下囡囡第一堂學咗啲咩先～～

幾開心呢～～夢想成真喎～～

第一堂後第一次練習。

只學單手撥弦，學了Mary has a little lamb。

第二堂就要雙手一齊撥弦。

第三堂學嘅有啲唔同，要左右手一齊用。

 同埋主力練習用三隻手指發力。

豎琴係唔會用尾指㗎，因為冇力嘛。

其實每次練習完， 手指仔都會超痛。

老師話起碼半年後就會好啲。

今次因為係囡囡自己要求學，

所以就算幾痛都會死忍。

好！！媽咪一定會十卜到底！

最多返屋企再塗啲lotion潤一潤(^｡^)

我會盡量寫下囡囡學豎琴嘅趣事（可能對佢係苦事...(¬_¬))

等佢大個睇番啦～～

芝士蛋糕～最美味

最近都係主力係做麵包，

好耐都冇焗過蛋糕喇... （懶）

早上起床心癢癢，

好想做過芝士蛋糕食下～～

其實我個人比較偏愛食焗嘅蛋糕，

mousse反而麻麻地（只係其中幾款較喜愛）

所以一見到芝士蛋糕就會兩眼發光...(^o^)

今次搵埋個工人幫手用手機app影咗個video，

唉...其實都係影幾個鏡頭，

我都比個工人激死，

叫佢開始佢又唔開始，

我未準備好佢又撳start...

take咗唔知幾多個shot先攪掂...((~_~;)

之前都有post過，但今次我覺得做得比上次靚！

唔好意思，因為主力影video，

冇乜點影相呀～～

好彩影出黎都見得下人...

我做好冇獨食，

切咗一半比媽咪細佬，

自己一個食晒唔得了呀！

歡迎大家上Bullbull自家廚房﹣Private kitchen留言比我～～

ABC cooking studio Cake master course ~ 白梨蛋糕 Charlotte aux poires

今次學做嘅蛋糕真係好好玩，

唔係話難，

但要好注重細節...

如果唔留意，

個蛋糕邊位就會唔靚。

同埋好玩在可以學下新技巧，

唔駛一味焗完蛋糕，再「吻」cream咁悶。

用咗白梨做，

雖然係罐頭，

都都好甜，

我同同學仔學完後有剩都唔好嘥食埋先走人。

個人覺得好滿意呀。

哈哈...有啲似玩砌圖遊戲。

老師話我知法文Charlotto係指女性嘅帽，

如果蛋糕綁埋絲帶就真係好似頂帽喇～～

中間係類似吉士嘅cream，我自己一口氣食咗兩件～～

影咗個做餅過程比家睇～～

不過仔女就唔係咁鍾意，

佢地覺得甜啲會好味啲喎。

反而佢地好鍾意出面嗰層...因為灑咗糖霜夠甜呀...

歡迎大家上Bullbull自家廚房﹣Private kitchen留言比我～～

ABC cooking studio 料理course ~ 泰式、土耳其、法式料理

除咗學蛋糕和麵包，

當然唔少得料理啦。

最近幾次都係上世界料理多，

嗰幾款日本料理唔係咁啱我食呀。

我學咗包括：泰式、土耳其、法式

先睇下菜式先：

泰式少肉碎飯，少少辣，好惹味。

點少得簡易版冬陰功湯

泰式炸蝦餅就差少少，唔彈牙。自己會改良下。

最後仲有甜品棷汁白玉丸子。

其實土耳其菜係咩呢？

原來係肉丸和香料飯...仲有菠菜。

香料飯可以再濃味啲就更好！！

我自己反而鐘意菠菜面嗰pat乳酪醬汁，好夾㗎。

法式當然唔少得紅酒燴牛肉啦！！

今次就揀咗用牛面珠登，炆起好滑...

佢地用嘅醬汁同我平時唔同，

所以煮起個汁好深色。

哩個汁除咗牛肉外，配雞肉或豬內都得㗎。

薯蓉再加多少少奶去煮會仲正。

尼斯沙律好足料，我真係食唔晒呀......

最後甜品係櫻桃布丁，

又係簡易版，隨時都可以煮比小朋友食。

朋友黎食飯都可以焗黎請客～～

以上咁多款，我最like係紅酒燴牛頰肉，

真係滑㗎，就算換牛尾或牛腩或牛肋條都得！！

唔食薯蓉改麵或飯又得！！

可以大好多唔同煮法，好實用。

下次會煮俄羅斯菜和打蕎麥麵，

到時再post比大家睇下我煮成點啦～～

歡迎大家上Bullbull自家廚房﹣Private kitchen留言比我～～