Natalie 豎琴日誌 ～～ 考4級試和參加比賽

學了剛剛一年（上年10月1日學），

經過不繼努力練習，

囡囡的彈琴技巧進步了不少。

5月考了二級後，到10月中再考四級試。

再加上10月尾的公開比賽，

可以話忙到甩轆呀！

豎琴要彈得好，

除咗要有好老師指導外，

經常觀察其他人彈奏都係好重要，

咁先知道出面世界原來可以咁大...

老師就係想阿女有一個機會擴闊眼界，

建議比佢參加第三屆香港豎琴比賽。

其實輸贏唔重要，帶住愉快心情去觀摩，

吸收其他參賽者嘅長處才是最重要呢！！

阿女雖然第一次參加比賽，

但那份自信和穩定，

令我好感動...(眼濕濕）

老師都讚佢表演好好！！

阿女自己話好好玩好開心，

仲問我幾時會再比賽....

佢似乎唔記得練習時辛苦嘅程度（手指又紅又腫）

哈哈......

講開豎琴，記得今年1月尾先送到（lever），

但到8月尾就幫佢換咗部Pedal，

唉...荷包又縮水喇...（嗚..）

哩首係囡囡比賽的指定歌...

我好鍾意首歌嘅melody，聽完好舒服。

係比賽自選歌又係考試歌

（好難彈呀）

另一首考試歌。Waiting 

阿女7月尾嗰陣有幸參加了Hong Kong Harp Centre攪嘅 Harpy Summer Academy。詳情稍後有時間再同大家分享。

佢地畢業典禮上會有合奏表演， 

係電影Pirate of the Caribbean的主題曲

阿女係最右白色裙那位。全部學生最細係佢呢～～

只要阿女肯努力，

一定可以有更好成績，

加油加油呀！！！

Icing Cookie ~ 森林和萬聖節系列糖霜曲奇

好耐之前已經開始上網學人地整糖霜曲奇，
不過有啲技巧總係唔能夠做得好，
咁啱比我見到fb有間做icing cookie好靚嘅shop有課程推出。
我又唔執輸報咗名，
先上咗初班（森林系列），
再報今次中班（萬聖節系列）。
由11點上到2點半...
我早餐各午餐都冇食呀...
完全忘我境界。

先重溫下初班嘅森林系列啦～～

初班唔算太難。

小甲蟲好可愛，我好鍾意...

松鼠仔好可愛

森林系列點少得樹和蘋果呢！

又要練寫字喇～～

蘑菇仔， 返到屋企我揀咗食佢呀～～（得阿女批准）

再到今次嘅萬聖節系列：

去到老師已經預好曲奇比我地，首先要油底色

今次一共做4款， 中間嘅熊bearbear係老師送㗎。

我最最最喜愛哩個南瓜少女，細緻度好高，非常難唧。

但我好開心，因為老師讚我唧得靚...（勁開心）

當然唔少得佢啦！！！

貓頭鷹又係難攪之作...

哩塊黑broad，全部要自己唧上去，仲要寫字...

我啲字體...都叫OK啦，但可以再改善一下...

問番老師，佢話雖然係中班，但其實技巧已經好多，

達到高級...

我好期待老師再開高班...等我嘅技巧再進一步。（笑）

歡迎大家上Bullbull自家廚房留言比我 Pls click～～

Airfryer ~ 雞肉串燒（附食譜）

新嘅Airfryer除咗換咗LED版面，

其實配件都出咗唔少。

我就買咗個做串燒嘅架連4枝鐵支......

由於我係即興想焗，

所以雪櫃有咩料我就整咩，

冇等別講究。

摷下個雪櫃見到雞肶肉，

就燒雞肉串啦！

如果有埋大蔥，

加埋一齊燒仲好味呀。

首先要做個汁先

汁：

日本醬油 1/4杯

砂糖 1Tsp

味醂 1/4杯

麻油少許

蒜蓉少許

煮滾（不需要大滾，有泡便可以熄火），攤凍，備用。

雞件切成厚薄一致，灑上少許黑椒粉

用airfryer 180度 preheat 3mins， 

先掃一層汁，

入爐焗約9分鐘，每3分鐘拿出掃汁，一前掃3次。

食時可以加少許檸汁。

非常簡單容易做。

歡迎大家上Bullbull自家廚房留言比我 Pls click～～

Le Creuset Bis ~ 西班牙冬甩 (Churro) 附食譜

月頭post咗上FB嘅西班牙冬甩見到大家反應好熱烈呀，

亦有谷友問我可可post食譜。

終於忙完小朋友嘅考試，

有時間補番之前應承過嘅食譜。

希望唔會太遲啦～～

材料同做法非常簡單，

但就記得要炸起盡快食，

凍咗感覺好油，唔好味㗎～～

比小朋友做小食就最好，

佢地食得又快，

食完補充體力可以再溫過書。

西班牙冬甩開 Churro (By Fung Gloria ) 參考自網上食譜

材料：

中筋粉（all purpose flour） 100g 

牛奶 150ml

無鹽牛油 20g

鹽 少許

雞蛋 1隻（先拂勻）

雲尼拿香油 數滴

肉桂粉 1tsp ＜﹣﹣
                                  預先攪勻

幼沙糖 1Tsp ＜﹣﹣

做法：

1.  先把牛奶倒鍋中，再加入牛油，用中火煮至微滾（切密大滾），加入已篩好的中筋粉， 攪勻。

2. 分幾次加入已拂好之雞蛋。留意每次必須要攪勻才繼續加。如果覺得粉漿太乾，可以額外逐少加入蛋汁（約1tsp）。

3. 灑上少許鹽，再加入雲尼拿香油。

4. 預先剪好牛油紙 （size 視乎你想整幾長幾闊）

5.    把粉漿唧在牛油紙上。

6.     預備滾油至170度，放入已唧好的粉漿，切勿一次過放在太多。炸至金黃色便可以拿出，隔油。趁暖加入肉桂粉和幼沙糖。即成。

＊  ＊可以改用低粉（質感會較鬆），或高粉（質感會硬身）＊＊

＊  ＊食時可以拌入朱古力漿＊＊

＊  ＊做好要即時食，放隔夜會變淋，唔好食。＊＊

      ＊  ＊最好先炸一兩舊，檢查一下熟唔熟。＊＊

歡迎大家上Bullbull自家廚房-Private Kitchen留言比我～～

Toshibi 水波爐GD400 ~ 扒房湯種牛油小餐包 （附食譜）

細細個去扒房食飯，

真係一件好開心嘅事～～

點解咁開心...

原因係因為我阿媽佢只鍾意飲茶，

唔多like食西餐。

咁啱酒樓旁邊有間西餐廳，

次次跟住阿媽去到酒樓門口，

都好想（係熱切嗰種）佢會轉彎過去隔離...

之但係......失望居多......（諗起就傷感）

不過雖然係失望多，但重會有幾次係成功嘅! (笑晒口）

哈哈......隨住自己大個咗，

爭取成功嘅機會多咗呀！！

弊傢伙，好似離咗題添～～

講番個餐包先...

我好鬼死like嗰啲牛油小餐包㗎！

紅湯和白湯，

我次次都揀紅！！

配埋牛油餐包（成舊牛油放晒落個包），

好好好好食呀！！！（流ing口水）

到我識做包，

都會自己做下～～

間唔中都會上網睇下人地嗰啲...

今次無意中見到有個食譜係用湯種，

所以想試下做～（師兄烘焙煮教室）

先參考佢嘅食譜，再自已試溫度和時間。

結果當然成功啦。

我成日都同朋友講，

食譜係要自已消化改良，

唔好死跟，

大家爐溫又唔同，

麵粉牌子又唔同，

真係要試下先知邊個份量啱自己。

扒房湯種牛油小餐包

食譜份量如下： （參考自師兄烘焙煮教室）

高筋粉 250g (我用流淚粉）

糖 25g

鹽 2g

鍊奶 40g

暖牛奶40ml （唔好過42度呀）

淡忌廉 35ml

蛋1隻（或52g)

快速酵母 3g

湯種 50g
無鹽牛油 30g

提子乾適量 （但我冇加，因為屋企冇呀）

湯種做法：

把50g 高筋粉加入250ml 水。

用細火加熱，不停攪勻，至杰身，

用蛋拂攪時會見到紋便可以停。

用保鮮紙蓋在湯種面（黏實），

以避免吹乾。

可保存2至3日。

如見到面有灰色便不能用了。

麵包做法：

1. 把所有材料放入大盤內。(糖、快速酵母、暖牛奶、牛油除外）
2. 再加入糖，在糖的上面放入酵母，再在酵母上倒入暖牛奶。（令酵母發酵更理想）
3. 用Bosch M8廚師機先打至成糰，再加入牛油打至光滑。（我大約打了十多分鐘）
4. 第一次發酵40度45分鐘。（至兩倍大）
5. 拿出排氣，分成9個（我今次每個57.5g)
6. 醒麵糰10分鐘，再次排氣，搓圓，放入方型盤內。
（因為我用咗脫模劑，所以唔駛加牛油紙）
7. 噴水後用濕布蓋著第二次發酵用40度發40分鐘。（至兩倍大）
8. 預熱焗爐180度。
（因為我用Toshibo水波爐，所以preheat時間好短，
如果用普通焗爐就要早啲preheat喇。）
9. 第二次發酵完畢，在麵糰表面掃上全蛋汁（不用太厚，會容易焗燶）
10. 入爐180度先焗10分鐘， 再轉160度焗7分鐘。
11. 焗好後要盡快脫模，攤凍。
12. 加入厚切牛油或果醬，非常可口。

圖中是第二次發酵後，等待掃蛋汁。

小餐包表面光滑，顏色也很多漂亮呢！！

每個都好夠份量。

撕開後，是一梳梳的，軟熟到不得了～～

就算冇廚師機都可以用手搓，

只係要搓耐少少， 

因為今次個小餐包麵糰較濕～～

下次有時間再打番先前facebook個超鬆軟鍊奶包嘅食譜～～

後記＊＊即日下午～～真係忍唔到呀，點都要再食多過，厚牛油實肥C啦＊＊

幾日後...我又整喇～～

上次第一次發酵完唔記得影相，今次整就我記得補番～～

我等，我等，我等等等.......40分鐘後

搽蛋漿先...圓轆轆，好飽滿。

出爐... 我發覺上次搽日本蛋漿，

焗出黎嘅色水比今次用 泰國蛋漿靚。

anyway...超正餐包食得！！！

一陣會夾塊和牛免治做漢煲。

歡迎大家上Bullbull自家廚房留言比我～～

沙樂美腸菠蘿煙三文魚Pizza（附食譜）

阿仔最近好鍾意食西式嘢，

除咗成日要我慢煮牛扒外，

pizza都係佢熱點之一。

我好多時都會焗咗個批底，

再冷藏好，到食先拎出黎加餡，

簡單方便。

Pizza一出，基本上唔駛叫阿仔已經可以食晒半個～～

哈哈......懶人之選。

我今次用普通焗盤，

其實Le creuset 22 buffet都好適合做pizza，

隨大家喜歡啦～～

材枓：

高粉70g

低粉130g

鹽 3g

糖 3g

牛油20g

即溶酵母 4g

溫水 110g （牛奶也可以）

第一次發40分鐘，拿出把空氣壓出，醒麵糰10分鐘。

再壓成圓型，放些Mozzarella cheese在邊位做芝心批～～

第二次發酵15分鐘，掃油，在批底吉窿入爐 200度焗至金黃色（約8分鐘）。

餡料隨自己喜歡啦～～

我就加咗沙樂美腸、菠蘿粒、煙三文魚。

180度焗15分鐘食得！

我屋企人比較鍾意用千島醬，

好食過茄醬。

歡迎大家上Bullbull自家廚房留言比我～～