Little Paris Kitchen ~ Rachel Khoo 的食譜 ～ 迷你朱古力泡芙 Chocolate Puff

最近迷上睇Rachel Khoo的飲食節目。

其實明珠台有播，不過我真係頂唔住個女配音員，

把聲太尖，一路聽一路打冷震。

Rachel 一共出咗兩本Little Paris Kitchen系列嘅書。

我就買咗佢第一本。

佢本書真係好鬼厚身，

食譜種類包羅萬有，

加上佢又會介紹下當地人飲食文化，

所以唔似一般嘅食譜，

非常多嘢睇。

另外佢嘅做法非常簡單易明，

材料亦唔算難買，

大家有興趣不妨買番本睇下～～

我就揀咗佢其中一個食譜試做。

迷你朱古力泡芙

（佢個名係法文，我都係改番個自己容易明嘅名）

一口一啖，下午茶超正！

迷你朱古力泡芙 （食譜參照Rachel Khoo)

材料：

水 125ml

牛奶 125ml

牛油 100g

鹽 1tsp

糖 1tsp

高筋粉 170g 

蛋 3隻 （大size，如果係中size改用4隻）

icing sugar 適量

烘焙朱古力粒(不溶） 適量

做法好簡單：

焗爐預熱180度。

放入牛奶、牛油、水

用中火煮溶所有材料（要不停攪捲）

離火一次過加入所有高筋粉

開中細火，不停攪拌，直至麵糰變不黏煲底。

(開始練習手臂力喇！！）

當麵糰變暖可以加入雞蛋。留意要逐隻加，攪勻後再加第二次蛋。

起初麵糰和蛋會分離，但放心再用力攪多幾下就可以混合。

攪到好似圖中嘅粉漿已經OK。

用5cm嘅圓咀以90度直角唧出，每個距離約2cm。

先灑一層糖霜

再加朱古力粒，之後再灑多一次糖霜就可以入爐。

焗約20﹣25分鐘

我屋企兩個焗爐，一個要焗20分鐘，另一個要焗25分鐘，自己執生。

出爐喇，個個肥嘟嘟。我偷食咗幾粒。

正到不得了。

用埋LC 花花碟裝住...幾靚。

第二日原本全滿嘅食物盒只係剩番1/3咋。

你話幾受歡迎呢！

＊＊隔日食只要放入airfryer 以150度焗4﹣5分鐘，就可以變番外脆內軟。

試後感：Rachel嘅食譜係得㗎，而且仲幾好味添，

下次我會再試埋其他菜式，諗起都流口水呀！

               歡迎大家上Bullbull自家廚房留言比我～～

Brother 1250電腦繡花家用衣車 ～ Cotton time 手提袋

我部舊衣車上個月因為我嘅大意，

跌咗落地，離我而去...(嗚嗚）

計番下部衣車都陪咗我差唔多七年，

點會話冇感情，

所以我都心痛咗成個星期呀。

不過阿Do見我咁傷心，

安慰我話買過部新比我。

呵呵......咁又唔同，

所有唔開心一掃而空喇～～（心情360度轉變）

講過要算數嘛，

為免夜長夢多，

我上網係咁睇，睇下邊款啱我先。

當初我買嘅係好basic款，

到而家，自己技術已經比之前好，

所以決定要揀部勁啲衣車。

最後上LEBO見到有好多Brother款，

自己不嬲又用開，

加上我又去埋勝家門市，

最後都係拍板去LEBO買。

雖然要去到荔枝角咁遠（我家住南區呀）

都同媽咪一齊去睇。

上到去LEBO嘅staff又幾好人喎，講解又詳盡，

經佢地推介後，決定選咗哩一部 Brother Innovis 1250電子繡花衣車。

我而家成日都會做袋比囡囡用，

有埋繡花，仲可以繡佢鍾意嘅pattern落去，

真係好掂呀！！

我又拎番好耐之前嘅cotton time (5月號），

見到有塊靚布送，

個袋款又靚，

就照住做。

好彩我都記得點做，

唔係又要請救兵喇。

請大家睇下我嘅成品先～～

係唔係都見得下人先～～

就係哩一部衣車， 

其實佢地仲有另一個model同哩款一樣，

有內罝Disney嘅卡通人物，

不過我自己配咗software，

可以自己搵圖畫再用機繡出黎，

所以慳番幾千蚊買咗哩一款囉。

其實做起都好細個，

但小巧精緻。

再黎個shot睇清楚。

用咗磁石扣，

放銀包唔怕咁容易跌出黎。

側睇都唔錯，

如果下次買塊棉麻做，

效果會更好。 

放埋銀包、tissue、key bag都OK㗎。

如果係返工嘅朋友，

出去食lunch拎位哩個袋真係又方便又美觀。

唔好意思，係咁sell自己做嘅袋添，

不過部衣車用起上黎真係得心應手，

絕對直得推薦比大家！！

黎緊都會繼續努力，

得多幾個，

咁先回番本呀～～（嘻）

後記：好多謝阿DO幫我喺日本訂繡花線，

因為日本做緊特價，比香港平呀！！

等我諗下，下一個作品繡咩好呢？

               歡迎大家上Bullbull自家廚房留言比我～～