Vitantonio 鬆餅機～ 鯛魚燒（朱古力粒）附食譜

哈哈...一不離二，二不離三，

橫掂都開機，

不如就做多一款鬆餅啦，

今次又用新模﹣﹣＞鯛魚燒

我記得好細個，媽咪帶我去八佰伴行超市個層，

總會隔住玻璃見到有部機會自已做魚形豆沙餡餅，

我成日都好想媽咪買比我食。

所以對我印象深刻㗎！

而家有埋魚形模，

可以盡情咁整啦！！

我朋友喺fb見到後，已經落晒order要我做啲送比佢地。

死火，欠人咁多order走路都唔掂喎～～（哈哈）

其實鯛魚燒可以有好多唔同食法。

餡都可以有好多種。

今次我就加咗朱古力粒。

材料好簡單：

 （食譜參考：每家必備之鬆餅機）

低筋粉色 100g

泡打粉3g

油 15g (花生油除外，要揀淡味）

雞蛋100g (約2隻Msize）

糖25g

鹽少許

牛奶 55ml

入爐朱古力粒25g

先把蛋打拂好，加入糖、鹽、牛奶攪勻。

加入把已過篩的低筋粉和泡打粉、油攪拌成麵糊。

如圖中的杰度。

最後加入爐朱古力粒。（鍾意可以自行再加） 

掃油後，熱機直至見到綠燈著了，可以倒入麵糊。

要倒至麵糊谷起（唔夠麵糊，焗起唔會肥嘟嘟㗎）

焗4分鐘。（深色啲可以再加30秒） 

起模後灘凍，放入密實盒儲存。

自己落手做，寧舍好味道。

下次會改用吉士和豆沙餡，

一個模可以做到咁多款，

你話係唔係買得抵買呢！！

而家諗起就想食～～

歡迎大家上Bullbull自家廚房留言比我～～

Vitantonio鬆餅機～ 比利時鬆餅（附食譜）

我真係越黎越鍾意嘅部Vitantonio鬆餅機～～

唔怪之得喺日本咁賣得！！！

我最欣賞係溫度夠準，

每次都係同一時間就做到，

唔駛每次要左check右check咁麻煩！

首先我做咗吞拿魚飛碟做早餐。

唔好意思，因為太肚餓，

所以唔記得影相。

到咗下午，

我開始試做比利時鬆餅。

由於做好麵漿後要放一小時發酵，

所以要預先準備好，

咁小朋友返黎就可以有得食～～

今次我用跟台灣書嘅食譜做，

下次先再試用日本版嘅食譜做比較。

材料好簡單，都係離唔開低粉、糖、蛋、奶、酵母、牛油。

發酵咗1小時就可以用～～塗油熱機後，可以加一大匙麵漿，

跟住喺面灑上珍珠糖。（可加多啲，甜甜地好好味）

珍珠糖，我去CC叔婆買㗎。

焗4分鐘，食得！！

今次口感同平時waffle有啲唔同，

可能因為曾經發酵，

食落幾有彈性。

不過下次我做再做細塊少少，

而家食一塊已經飽晒喇～～

比利時鬆餅食譜（食議參考：每家必備之鬆餅機）

低粉90g

intant yeast 2g

sugar 20g （唔鍾意甜可以自己減糖）

蛋30g （約半隻）

牛奶45g

室溫無鹽牛油25g

珍珠糖（灑在鬆餅上），冇都可以唔加

做法：

1.先把過篩低粉加入糖和酵母一起攪勻。

2. 慢慢加入蛋和鮮奶，最後再加入牛油。

3. 麵漿會比較稀身。

4.蓋上保鮮紙，放在室溫發酵1小時。

5. Vitantonio鬆餅機先掃油熱機，加入約1大匙麵漿，再灑上珍珠糖，焗4分鐘。即成。

＊＊記得每次加入新麵漿之前要掃油，否則鬆餅焗起唔夠色和不夠脆。＊＊

歡迎大家上Bullbull自家廚房留言比我～～

新玩具從日本而來～ Vitantonio 鬆餅機 （附Waffle原味＋朱古力味食譜）

好耐以前喺外國生活個陣，

都有用鬆餅機做waffle食。

但返咗黎香港之後，

都冇乜點做過喇。

你知啦，

香港太方便，

買乜都好容易。

不過有咗小朋友後，

因為佢地都鍾意食pancake之類嘅小食，

我就多咗自己做。

不過次前部機死咗（用咗成十年都時間要退休喇～～）

咁啱上網睇下有咩好介紹，

結果就見到好姊妹都大力推介日本品牌：Vitantonio鬆餅機

但講明係水貨機，當然要拖隻牛仔啦。

今次隻牛比用P仔仲要大隻，所以未必個個人接受到㗎～～

能夠買到哩部機首先要多謝阿Do，

佢去日本出trip時，

起得切3月31日上網幫我訂，（日本4月1日加稅）

雖然因為大多人買，

攪到其中一款模冇晒貨，

但我都好滿足～～

等我下次先再配埋另一個模啦～

睇番Vitantonio，

佢地出咗好多唔同型號，

我哩款係VWH-4100-W

日本已經停產，

所以而家賣嘅都係貨尾。

貨尾仲好呀，因為佢地好多時會包多一款模，

價錢抵好多。

我今次就係包咗三款模，包括：格仔、三文治和魚型

另外我又配多一個冬甩模。

你話咁多個模係唔係有排玩呢！

 

另外阿Do仲幫我上網買埋Vitantonio食譜，

雖然我日文唔叻，但有埋圖點都睇得明白～～

跟住書做法簡單，熱機再掃油，加粉漿，焗4分鐘。

又香又脆，如果有埋雪糕仲正。

     原味Waffle 食譜：（可做四格waffle)

By Gloria Fung/ Bull Bull 自家廚房Private Kitchen

低筋粉100g

泡打粉 5g

牛油（已溶）30g

糖25g

鹽1g

全蛋1隻(約50-55g)

牛奶100ml

做法：

1. 先把低筋粉和泡打粉混合過篩，再加入糖、鹽，用蛋拂攪勻。

2. 逐少加入蛋和牛奶（交替加入），攪好。

3. 加入已溶牛油，粉漿會慢慢變得杰身。

4. 放約15分鐘，備用。

5. 先熱機，著綠燈後打開掃油，加入粉漿，關蓋。

6. 4分鐘後可以打開拿出。

7. 可自己加上喜愛的配料一起吃。

朱古力味waffle:

只需另加10g 無糖唂咕粉，跟低筋粉和泡打粉一起過篩。

其他部驟跟原味waffle一樣。

先調好朱古力漿。

加入適量到waffle機內。

焗起要即時拿出。

我加咗少許icing sugar在面，賣相靚好多。

跟住又做埋飛碟比小朋友做下午茶。

我焗咗4分鐘，金黃色，唔覺唔覺食咗好多呀～～

仲有個魚＋冬甩模未開齋，

試完稍後再post上黎同大家分享啦～～

用完vitantonia鬆餅機，

馬力真係勁好多，

只需要好短時間已經焗好。

比我以前用嘅waffle機勁好多。

我而家做比小朋友下午茶方便好多喇～～

如果鍾意食waffle嘅blog友，

V仔一定可以滿足你！！

歡迎大家上Bullbull自家廚房留言比我～～

ABC cooking Studio ~ 芒果慕絲

天氣熱成咁最好係食乜呢？

當然係凍冰冰嘅芒果啦。

今次學做嘅係芒果慕絲，

做法都算簡單，

材料都唔難買。

經過成個鐘頭嘅車程先返到屋企，

因為今次我用膠紙痴得好實，

所以返到屋企打開個盒睇都冇話散晒～～

我媽咪、兩個小朋友同阿Do已經試食過，

媽咪同小朋友就好鍾意，

但阿Do就話乳酪自己麻麻地，

但都好好味喎。（唔知係唔係真心呢？）

阿Do話我整得好似酒店出品，張相亦影得好靚。

慕絲入面有兩層朱古力海棉蛋糕，

加埋有芒果酒嘅乳酪和面頭嘅芒果布甸，

口感豐富呀！

上層嘅原粒芒果都有啲酸，

配埋芒果布甸，

完全中和咗酸味，

變得啱啱好。

下次我會改良一下，

試下用士多啤梨做，（我勁鍾意士多啤梨嘛）

應該都會唔錯。

歡迎大家上Bullbull自家廚房留言比我～～

Bosch M8廚師機 ~ My brother's Birthday Cake

細佬生日喇，

我應承咗話焗個蛋糕送比佢，

所以 趁兩個小朋友去咗上興趣班，

拿拿聲焗起個清蛋糕先。

不過第一個唔知發生乜事，焗唔起？

後尾先發現自己大頭蝦，

高粉當低粉用。

唯有掉咗去再做多一個～～

今次當然成功啦，

唔成功真係抵打呀！

我今次用咗去sogo買嘅日本士多啤梨，

又甜又大粒！

由於我只係做6吋蛋糕，

所以只係用3粒已經足夠喇。

講到打忌廉，

M8出馬當然唔會有問題啦！

話咁快就打好～～

到咗最難攪嘅部份：「敏」cream

因為唔係成日練，

所以都整咗好耐先滿意。

今次唧水滴型，唧得嘛嘛地咋，不過總算見得下人啦～

 到最後當然仲有我次前上淘寶淘番黎嘅靚靚蛋糕盒。

size真係啱啱好，多一吋都放唔到入去。

拎住送比人真係大方得體～～

6吋細細個，cream又唔算多，

一人一件好快食晒～～

好彩細佬好鍾意，

哈哈...唔鍾意都唔得啦，

做家姐等登做黎送比佢。

不過講真，

自己做又平D又好食D，

加咩料都得，

M8～我愛你呀！！

歡迎大家上Bullbull自家廚房留言比我～～

ABC cooking studio 和熊本縣合辦～做太卷

而家先出哩個post好似遲咗好多呀，

不過冇法子啦，

先前阿女中耳炎，

再到阿仔感冒要去學校接佢放學睇醫生，

跟手再傳染埋比我，

病到我死死下，

攪到我邊有心機寫blog喎。

之但係，

我又好想分享今次嘅event喎，

所以遲啲出都唔緊要啦～～

哈哈...今次ABC cooking studio 和熊本縣合辦，

主要係推廣熊本縣出名嘅白米。

對於我黎講，最大吸引力當然係熊本熊Kumamon啦！！！

我上次去日本個陣，

都有買Kamamon熊仔pattern嘅布，

諗住縫番個袋比自己用嘛。

今次整個event係45分鐘。

費用全免（仲可以又食又拎添）。

咁啱我去ABC上堂嗰陣，

田丸老師問我有冇興趣參加，

我當然冇問題啦～～

去到studio，

我發覺佢地安排比我個位超正呀！！

就好似係第一排正中，

直頭對到正熊本熊，

前面冇嘢遮擋。

影靚相無難度呀！

而家先追擊場實況先～～

等到頸長埋，熊本熊終於都到。

其實佢好準時㗎，只係我地好心急咋（笑）

佢一同我地打照呼，大家已經情緒高漲喇！

黎到介紹完後，就開始準備今日要做嘅事～做太卷。

熊本熊好威水㗎，有個日本姐姐專人服侍，

仲有埋私火手套戴住。

睇下唔駛1分鐘就攪掂。

睇下佢個相幾得戚～～擺晒post比我地影相。

首先由大西老師開始示範。

熊本熊都有專心聽㗎，最後仲自己捲好唔駛老師幫忙。

哈哈...成功咗當然又要擺番個戚樣啦！

我地捲個陣，佢仲成日走過黎撩我地，

攪到想專心捲都唔得呀～～（不過我冇嬲佢㗎，嘻嘻...)

最左手邊嘅就係我捲㗎，用咗熊本縣嘅白米，

捲起個型好靚，食落仲好好味（勁多料呀！）

做完太卷後原來仲有禮物收！

一包有熊本熊做嘜頭嘅日本米送比我地～～

睇下熊本熊幾surprise，見到自己個樣靚你咗咁多。

當然唔止得白米咁簡單，仲有保暖杯、襟針、擦子膠、環保袋。

日本人連米都用個靚盒包裝，真係唔捨得食呀！

個杯已經比個仔霸咗喇。

妹妹就要襟針和擦子膠（擦子膠唔記得影添）

仲有張好詳細教我地點熊本縣白米嘅說明書。

今次ABC cooking studio 和熊本縣合辦嘅活動，

真係好好玩呀，

又食又拎簡直滿載而歸。

希望佢地遲啲攪多啲類似嘅活動，

下次有機會一定會帶埋我兩個小朋友去一齊玩～～

歡迎大家上Bullbull自家廚房留言比我～～