ABC cooking class ～ 馬鈴薯煮肉

之前去過ABC cooking trial class 學麵包。

不過上完覺得自己都已識，

反而日式料理和蛋糕我比較少做，

所以決定報正式class，

體驗下正宗日式做法係點。

講到蛋糕，

因為一月份已經full晒，

唯有等二月份先開始。

不過料理啱啱12月份仲有位，

我又想試下十二月嘅馬鈴薯煮肉， 

聽過話日本每個媽媽都會煮。

今次教我地嘅係一位住過日本嘅香港女仔。

可能因為ABC cooking仲係好新，

運作上仲係好亂，

好多材料仍未準備好，

所以佢要走黎走去搵料。

不過值得一讚，

係佢好努力教我地三個學生，

問佢問題，佢都可以一一解答到。

我哩一set午餐擺得靚嗎？

所以食具係由ABC cooking提供，但可以自己揀用邊款。

主菜馬鈴薯煮肉，甜甜的，送飯超正！！

海草莖魚蛋海丸，個人覺得太腥，同埋唔夠彈牙。

黑豆飯OK，因為好早已經煮好，所以食落唔夠熱。

最令我驚喜嘅抹茶Bavarois，甜道適中，啖啖抹茶香味。

裝飾全部自由發揮～～

今次第一次正式上堂，

除咗係起先比較混亂外，

之後都冇乜大問題。

不過我建議ABC cooking studio要再請多啲人手，

我唔想企係登記處等入去上堂都要等差唔多8分鐘呀。

後記：
過咗個幾星期之後，我終於有時間實習。
雖然唔係做晒全部菜式，
但家中兩個小朋友非常鍾意食，
好快已經清晒喇～～

               歡迎大家上Bullbull自家廚房留言比我～～

Bosch M5 ～ 師傅示範法式和義式馬卡龍 Macaron (附食譜份量）

之前見到fb有谷友去咗sogo 10/F睇Bosch師傅示範整馬卡龍， 

其實做馬卡龍真係難度好高，

材料唔多，但技巧要求高，

錯一個step都可能會唔成功。

我已經心癢癢好想去玩場睇，

但又啱啱撞正仔女考試，冇得去。

跟住到15號，

同屋企人去BBQ， 我又再冇得去...

終於到咗22號，

抽到時間去睇。

因為塞車，我遲咗二十分鐘先到，

好彩師傅只係講解中，粉都未開始攪。

哩個師傅真係幾好，

連macaron起裙邊嘅原理都會講埋，

詳細到不得了，

今次可以免費上到堂真係抵呀！！

由師傅做嘅馬卡龍係唔係好靚呢？

師傅話做好後唔好即時食，

最perfect係放一日先食，

咁就會外脆內軟～～

今次做咗兩個色，餡就係一樣都軟心朱古力

師傅先後示範咗法式和義式。

圖中係義式要先煮溶啲糖再攪粉。

今次用咗M5打蛋白

加埋其他材料攪勻，我好鍾意嘅種色～～

師傅技術超勁，唔駛劃圖，個個都唧到一樣size!

見到有「loan」要放氣。

焗起可以快手拎出

睇下啲色同裙邊，靚到呢....

唧餡

唧完擰下塊餅

每位全程睇完示範嘅朋友都可以分到兩粒（法和義式各一粒），

工作人員仲包得靚靚比我地～～

我幾辛苦先忍到口唔即刻食，

不過放咗一日後，

又真係好好味。

我要努力，

雖然係好難成功，

但出面街買實在貴得過份，

都係自己整好啲，

又可以做得啲唔同味！！

希望不久嘅將來，

可以post上黎同大家分享。

CF的馬卡龍食譜：
蛋白 （室溫）44g
糖霜 30g
砂糖 55g
特幼杏仁粉 45g

朱古力餡醬：
鮮忌廉150ml
黑朱古力 85g
無鹽牛油 （室溫） 15g

               歡迎大家上Bullbull自家廚房留言比我～～

Bosch M8 ~ 糖霜薑餅人牛油曲奇

幾個月前，

從台灣仔買咗一本做手繪餅干嘅書。

曾經試做了其中一款蝴蝶型，

但夏天做真係好困難，

哩頭拎出黎吸模，

嗰頭就溶晒。

再加上用糖霜，

我又溝得唔好，

有時太杰、有時太稀。

雖然最後都做到，

但效果麻麻地。

啱啱哩個星期係阿女同阿仔嘅學校聖誕party日，

阿女好想好想我教佢做糖霜曲奇送比同學仔。

見而家天氣凍咗，

又諗下會唔會做出黎效果好啲呢？

所以前日屋企起壇（唔係作法呀），

開始教阿女做餅身。

其實唔係好難做，

只要用手攪勻個陣死命咁推，

曲奇就會脆。

阿女都算係一點就明，

雖然有啲步驟要我幫手，

但佢都好踴躍嘗試，

最後好快攪掂。

不過最攪笑，

係阿女望實個焗爐眼都唔眨，

怕曲奇會焗燶。

越睇越可愛嘅糖霜薑餅人牛油曲奇

先用Bosch M8打牛油和糖，

之前先改用人手撈勻麵糰。

阿女先壓平麵糰，

勁鍾意Joseph and joseph 壓麵桿，

左右加塊膠就可以壓想要嘅厚度（我用4mm)， 

好用又碌得平均。

問我媽咪借咗個薑餅人公仔模。

好快手就吸咗一盤薑餅人公仔

180度入爐焗咗約18分鐘。

攤凍之後，先用糖霜（幼糖霜粉＋蛋白＋檸檬汁＋水）畫出框框。

再快速填滿（糖霜要稀一點），風乾約半小時至四十五分鐘。

阿女用其他唔同顏色嘅糖霜畫眼睛、衫鈕...

加工完畢，又要再等乾

再遂一用包裝袋包好。 

睇下幾靚，小朋友見到點會唔喜歡呢！

我買咗幾款包裝袋，完成後係唔係要加分先！！

最後小女放學返到屋企，

話同學和老師起初唔信係我地做，

因為靚到好似街買。

哈哈...我仲收到阿女同學嘅媽咪whatsapp，

話啲曲奇又鬆化又有牛油香， 

叫我開班受徒。

聽到真係好開心～～

               歡迎大家上Bullbull自家廚房留言比我～～

Bosch M8 ~ 我做的第一件法式原味Macaron (附食譜）

成日上網都會見到好多人自己整馬卡龍，
咁又啱喎，
出去買一舊都要十幾二十蚊，
自己整平啲又抵嘛。
不過我對哩一款甜品麻麻地，
成日覺得太甜喇～～
直至最近去Grand Hyatt 嘅 Tiffin
佢地嘅開心果macaron真係正到暈，
我食完一塊再食一塊，
我老公笑話我抵番條數。

就係咁，
我嗱嗱聲搵食譜試下，
不過因為第一次整，
自己嘅要求唔高，
旦求起到裙邊，
唔好裂開已經收貨。

買晒所有材料後，
先用Bosch嘅食物處理器攪勻杏仁粉和糖霜，
跟住再篩，跟手再打蛋白，
唧好再等約半小時乾就可以入爐。
聽落係唔係好似好容易呢？
不過焗先係最難攪，
太耐又會裂開，
太快心又唔熟，
要做得好真係要練多幾次！

睇下我嘅成品：

睇落都唔失禮㗎！！配埋新買嘅LC熊仔碟，幾可愛～～

手攪哩一部份都要特別注意，

攪太勁Macaron就會焗唔起。

之前喺淘寶買咗塊熊仔墊，只要跟住唧就唔怕走晒樣。

先preheat 170度，入爐就轉130度，焗咗20分鐘。

（每個人爐溫唔同，焗幾耐要自己試，唔黏已經OK）

 好開心，起裙邊喇～～成功！！

攤凍後再加埋餡就完成。

法式原味馬卡龍 （食譜來自：法式甜點）

蛋白55g

糖25g

糖霜100g

杏仁粉63g

雲喱拿香油 1/8tsp

食用色素適量 （我用了粉紅色）

做法：

1. 把預先已攤凍嘅蛋白用機打至忌廉，再分幾次加入砂糖，繼續攪至蛋白硬身。

2. 加入已篩過的杏仁粉和糖霜輕輕攪勻。（切勿過份攪拌），最後加入數滴食用色素。

3. 用1cm圓咀唧造型，唧好再將焗盤「鄧」幾下。

4. 風乾大約30分鐘（冬天會快啲，夏天要1小時）至表面不沾手。

5. 焗爐先預熱170度。

6. 入爐，即時轉至130度繼續焗約15﹣20分鐘（個個爐溫唔同，自己執生）

7。焗好攤凍，最後加入喜歡的餡料。

餡料：（軟心朱古力）

Whipping cream 50ml

71﹪黑朱古力50g

做法：

1. 把whipping cream熱至大滾，離火。

2. 倒入朱古力內，攪勻至朱古力完全溶化，待涼。

               歡迎大家上Bullbull自家廚房留言比我～～

Bosch cooking 示範班實況

上年，因為朋友買了部Bosch Mum5 (俗稱M5），

送了一堂免費cooking demo class，

但係佢又冇時間上，

所以益咗我～～

到咗今年3月，

我由原本M5，換咗M8，(M5就過咗比我阿媽）

所以再送多咗一堂cooking demo比我。

一直忙住湊小朋友，

冇時間上，

直到最近小朋友考完試，

終於可以報名喇～～

但上課地點就改咗，

由中環變咗大角咀（奧運站出，再步行一段路，唔算難搵）

地方寬敞咗，所有Bosch嘅產品都有display出黎，

我因為怕自己唔識路，

原本上堂2：30，

我2：00已經到咗喇～～

早去有着數，

就係可以坐到頭位正中，

睇示範最清楚。

因為時間尚早，

我就周圍望下，

Bosch 嘅staff都好好人，

佢地忙於準備但都肯解答我嘅問題。

差唔多正式開始，

因為臨近聖誕，

所以預備咗好有聖誕feel嘅包包同蛋糕做示範：

包括聖誕士多倫麵包＋簡化版樹本蛋糕

今次唔例如，都係由陳CF負責做示範（大家有行開sogo或一田都一定會認識陳CF）

睇下靚靚簡化版樹木蛋糕

陳CF教我地唧花嘅技巧

焗出黎又真係幾似樹皮喎。

另一款啱啱出爐嘅聖誕士多倫麵包

 再塗上牛油和灑上糖霜。

不過我自己麻麻地鍾意乾果，如果下次自整，只加杏仁片和提子乾。

cooking studio幾靚，後要又有個projector，

就算坐好後都可以睇得好清楚CF做緊乜。

當等緊麵包發酵，有空閒時間，

會有bosch職員講解Bosch 廚師機嘅配件。

我其實想買做香腸嘅唧咀，

但原來已經成個幾月冇貨，

不過我又唔係話好心急，

等下次有先再買啦～～

最後又係因為近聖誕節，

佢地準備咗嘅小禮物送比我地（係今堂開始先有）

我哩幾日會焗咗先～～

因為兩個小朋友話等唔切喎～～

               歡迎大家上Bullbull自家廚房留言比我～～

舊blog寫嘅Airfryer食譜和其他post

真係忙呀，忙到...二十四小時都唔夠用。
攪到以前喺yahoo blog嘅所有食譜都冇時間搬過黎。
自己都覺得好可惜，不過我對電腦又唔多熟，
唔知點樣可以搬快啲。
但隨著yahoo摺埋嘅時間迫近，（放心我已經dowloand晒有record，唔會唔見）
大家想睇番都好難。
我會的起心肝，盡快搬入新blog，
方便大家重溫。

比啲時間我呀～～～

               歡迎大家上Bullbull自家廚房留言比我～～