Natalie豎琴日誌～ 參加2016年第七屆法國豎琴大賽勇奪冠軍

真係耐到唔記得上次嗰篇喺幾時寫，
唔係我想懶，而係太太太忙，
已經忙到連身體都出現問題，
經過了三個月的休養先好啲......

上次提到阿女已經成功在同年10月考到了四級，
考級其實除咗練琴外，亦練習耐性，
試諗下要你個幾月彈同樣嘅歌真係會好悶，
所以每個小朋友考級唔駛理pass唔pass都應該要比掌聲佢地！！！

考完四級後並沒有因此而放鬆。
阿女開始參加香港舉辦嘅豎琴比賽，
吸取多啲臨場經驗。
第一場已經係大賽～第三屆香港豎琴大賽。
雖然第一次參加，但佢完全冇怯場，
睇番評審仲讚佢比現好...

12月份，豎琴老師提議想阿女參加2016年2月份在法國舉辦嘅豎琴大賽。
我都好有疑問，佢唔係學咗好耐（都係一年多），會唔會太急？！
老師解釋話阿女一定冇問題，因為佢好勤力，心理質素也不錯（不容易受外界影響）。
好啦，既然老師都咁講，我同Natalie爸爸就決定支持到底！
又係一樣，同一首歌大約連續練了一個多月就去比賽。
今次由我帶Natalie去，Natalie老師都有一齊，
去到法國我當然好似個阿四咁要照顧阿女啦。
最辛苦係時差，一落機就要再轉約4小時火車到Limoges，
去到已經傍晚6點，是旦食碗杯麵，七點就開始要練習。
Natalie其實都幾辛苦，因為當時已經係香港凌晨2點，
佢練到想瞓著......但仍然堅持住
練了一小時我帶佢就返酒店沖涼瞓覺，
我當然仲未有得休息啦，因為翌日下午佢就要比賽，
我要預備好所有用品先可以休息呢！！（哩個阿四唔易做）
好彩小朋友適應時差好快，瞓飽已經夠晒精神比賽～～
可憐佢阿媽我仲係好似隻熊貓咁對眼黑過墨斗～～

今次阿女嘅對手有17人， 來自世界各地，
佢係第二位細個（最細那個細佢半個月），
見到佢上台毫無懼色，彈得比練習嗰陣更好呢！
到頒獎禮，但因為係用法文，
我同老師都唔了解佢拎到第幾名，
哈哈......要麻煩當地識英文嘅負責人解釋我地知原來係得到大獎：評審一致頒發冠軍，
開心死我地呢！！！！
辛苦得到回報了～～

出外比賽能夠令到Natalie可以見識到出面嘅世界有幾大，
吸取更多台上經驗，遇到問題要如何自己解決，
這些是用錢也學不到的經驗。

而家同大家分享一下當日比賽嘅片刻。

阿女，未來要加緊練習呀！！
努力去追尋你的豎琴之夢～～

Natalie豎琴日誌（第七個月）Harp Exam 二級考試仲有兩日就到了～～

好耐冇update囡囡學豎琴嘅情況，

唔係懶，而係真係好忙，

攪到連blog都冇咩時間寫。

阿女而同我一樣，剛剛兩星期前先完成學校測驗週，

但因為豎琴考試快到（後日15/5/2015就係喇），

所以每日都努力練習，

彈到手指仔痛都要繼續～～

講起學琴，

由上年10月1日到而家已經七個月了，

時間過得好快，

當時佢只係彈緊啲好簡單嘅歌仔到而家要彈二級歌，

轉變很大，

屋企而家日日播嘅歌（即佢而家每天在家中練習嘅歌），

都變得比以前複雜。

不過阿女似乎越難彈佢就越鍾意彈，

佢話冇咁悶喎...(¬_¬)

不過最近兩個月都彈三首歌，佢有時都會覺得好悶...（我都係呀），

之但過咗今個星期，其中一首仍要繼續練習，

事關佢參加咗學校才藝比賽入了決賽，

就係用其中一首考試歌去比賽囉。

諗起又要搬琴返學校就頭痛......

上次搵人搬要1200蚊呀，

為咗慳錢，今次搵咗細佬幫手......

先同大家分享第一首：

唔好意思，因為可能我錄音時按住個mic，

所以音樂聲較細。

哩首講求快同流動性，哩個version仲未係最快～～

帶有神秘色彩和印度feel，

阿女最鍾意彈。

哩首係最先學嘅歌，阿女話係三首中最難彈，

因為又要快又要連貫性。

佢都係用哩一首參加學校才藝比賽。

我已經keep住聽咗1個半月了。（暈）

預備功夫已經做足，

希望星期五佢唔好咁緊張啦，

用番平時嘅表現，

應該唔會有好大問題～～

阿女加油呀！！！

Natalie 豎琴日誌（第5個月）～ 南區青少年藝術節表演

話咁快阿女學豎琴已經5個月喇。

有時睇番佢之前學嘅video，

覺得佢真係進步咗好多。

之前買琴所考慮嘅問題（例如：怕佢冇恆心）

而家完全唔再擔心。

見到佢每日無論幾忙，

最少都會抽30分鐘練琴，

哩一份毅力非常值得加許呢！！！

由於佢肯努力，

所以比老師揀咗出席「南區青少年藝術節」。

老師仲特別教佢彈咗首新歌，

用了兩個星期準備～～

首歌唔係長，但手指移動要快，

對阿女黎講，非常有挑戰性。

不過我反而係擔心佢會驚，

似終係第一次面對群眾，

學豎琴日子又短，

怕佢唔夠信心。

去到表演當日，

阿女排第四個出場，

見到佢唔出聲，

塊面青BB，

只好不繼鼓勵佢。

但出場後，佢變得好有自信，

完全冇發台瘟，

仲彈得好順暢。

表演完仲同我講好開心，

希望以後多啲機會再表演。

哈哈......原來佢識得自己調節心情～～

黎緊學校會有才藝比賽，

阿女會以二級考試歌出賽。

輸贏唔重要，

最重要係有自信！！

努力呀！！！！

後話：老師同我講，叫我要儲定錢喇，

因為相信阿女兩三年內可以換Petal Harp。（而家彈嘅係Lever Harp)

哇....成6位數字呀，

要節衣縮食先掂呀～～（爆笑）

Natalie 豎琴日誌 （第四個月 ）新琴送到：Lyon & Healy Prelude 40 Harp

睇番自己已經好耐冇update個blog， 

原因簡單，唔係因為懶，

而係太忙...忙住去日本呀！！

十二月份小朋友放聖誕假帶咗佢地兩個去北海道滑雪。

已經好耐冇滑，

阿仔上年要為升中一而奮戰到底，

所以全家人去旅行嘅計劃要壓後...

今次去七日玩餐包！！

最開心係囡囡一個早上已經學識滑雪，（呵呵...佢個老師咪係我囉）

下午已經上初級滑雪道自己玩喇～～

不過返到香港唔夠四日，

我又要同老公再飛東京，

此行係公事，

要幫老公手攪展覽。

講講下，好似講咗我去旅行日誌添～～(⌒-⌒; )

講番正題先～～

先前曾經提及過會為囡囡買一部40弦嘅豎琴，

等呀等...又再等...終於一月尾送到喇～～（比預期快咗一個星期）

點解會咁想部琴送到？！

原因好簡單，

因為花在到琴行練琴嘅時間實在太多，

日日功課又鬼死咁多喎，

去練完返到屋企都五點半，

實在唔夠時間溫習呀！！

阿女又好勤力，連老師都讚佢，

不過佢練少一日又嘈，

唯有頂硬上啦！！

送琴黎嘅師傅好好人，

講解得好清楚。

佢好風趣㗎，

叫我而家好儲定錢，

話阿女好快就會改用另一更大型號嘅Pedal Harp，

最平都要六位數字...（;￣O￣）

睇下部琴有幾大部？

有啲人可能覺得奇怪，

點解唔買細部啲？

其實豎琴考試對豎琴係有限制㗎，

要超過某數量嘅弦線先比考試。

另外我都有帶囡囡親身去 Hong Kong Harp Centre度size和高度，

再聽埋專業人事嘅意見先買哩款L & H Harp，

唔係求其㗎！！！

聽講話而家訂琴，要等到八月先有貨呀...(OMG)

為咗令Natalie舒服啲，

我上個月仲買埋可以調較高度嘅琴櫈（屋企部piano嘅琴櫈冇得調高低）

再放埋腳踏比佢，

即時可以開始練琴。

Natalie的老師仲好盡責又細心，

佢當晚仲過黎我屋企幫我睇下有咩要執。

由於新琴到啲音會唔穩定，

所以頭個幾兩個星期都要調音，

但Natalie仲細，唔夠高又唔夠力，

所以重任唯有交比我啦。

老師教咗我download個apps，

方便我聽住黎調音。

睇佢好容易，

到我自已攪真係好有難度！！

最重要係我左手嘅手指勁痛呀，仲起埋水泡...（嗚..)

我真係好佩服阿女咁忍得...

佢痛到起泡甩皮都唔出聲。

另外仲學埋自已換弦線，

我都發覺得自己好勁呀。（嘻...)

經過4個月嘅練習，

剛剛學咗1級考試歌。

彈得唔係好熟，但都同大家分享下～～

黎緊仲要學三首二級考試歌（4月就考喇），

有咗琴部，

可以慳咗好多時間練習，

阿女你要比心機呀！！！

囡囡旅行日的便當～～Frozen 的小白

往年囡囡嘅旅行日，

都要家長一齊陪同。

但今年升三年級就唔同喇，

會自己跟學校去...（大個女喇～～）

所以今年佢要求我特喇做個便當比佢帶去食。

因為天氣轉涼，

所以帶便當都唔怕會變壞，

最後上網搵咗個Frozen嘅小白...

其實我對Frozen套電影已經麻目了，

睇咗成百次套電影（陪女睇)，

首主題曲聽到發夢都識唱呀......

除咗便當，

我仲要做多一盤日式咖喱魚蛋。

不過魚蛋我就當日早上零晨五點半先起身煮。

講到便當，

除咗飯外，

我仲要煮多個甜蛋和薯仔炆牛肉，

都好多嘢要準備。

最後用咗兩小時先完成。

先切好晒啲材料，煲好昆布湯底

甜蛋就用我上年在日本買嘅新pan煮，

好快攪掂。

我將甜蛋切成心型，另外香腸做八爪魚。

哈哈...放好材料攪掂。

不過因為懶，

冇特別整埋對手，

不過阿女起身見到已經勁開心！！

後話：回家只係剩下一舊飯和一條香腸，

跟手火速清晒喇～～

仲叫我快啲再做比佢食～～

其實做便當真係幾好玩，

不過就真係要用好多時間和耐性，

下次又輪到聖誕節party，

哈哈...做人媽媽真係要萬能，

乜都要識啲～～

Natalie 豎琴日誌 （第四至六堂）

轉眼又到第四至六堂了。

問番囡囡覺得指仲有冇以前咁痛，

佢話相比第一堂而家已經好好多。

其實學豎琴最重要係開頭學要頂得住痛楚，

好多小朋友都係因為頂唔住所以唔肯再繼續學。

不過睇到佢手指又紅又腫，

真係心都痛埋...

又要講番進度先。

老師讚阿女的態度非常認真，

雖然要特登落琴行練琴，

有時又唔可以練得咁密，

但進度好好。

所以老師決定再教多啲歌同埋技巧，

希望Natalie可以出年八月考到二級。

今次右手要三隻手指彈，左手就要夾，

有時理得右就理唔到左...

不過苦練後都還可以啦。

由於見到阿女放學再去學埋再返屋企已經五點幾，

仲要星期一、四和五都要落琴行練琴，

實在係太辛苦了。（功課都唔夠時間做）

同老師傾過再同老公商量過，

最後決定買部Lyon & Healy40弦豎琴，(可以用到8級）

但要等到出年1月先到貨，

而家唯有耐心等待...

我當然希望可以快啲到啦，

咁樣阿女就唔駛咁辛苦去練琴～～

進度亦可以提升。

Natalie豎琴日誌（第一至三堂）

囡囡轉眼間已經三年級了～～ （我又老咗喇～～） 

開學已經三個月，

功課亦比以前忙...(多到令我頭痛（−＿−；））

見到佢有時讀到好辛苦真係幾慘。

所以我一路都係比佢上啲佢有興趣嘅課外活動去減壓，

例如：畫畫、跳芭蕾舞、鋼琴。

但其中有一項課外活動我一路都唔比佢玩...就係豎琴。

豎琴其實係好難學㗎！

因為係用手指撥絃，所以會好痛...唔止痛仲會脫皮。

我就係擔心佢怕痛而三分鐘熱度...所以唔比佢學。

而且學豎琴嘅學費都幾貴㗎...（荷包會好傷）

不過今次見佢好有決心想學，

而且比佢試堂後，

老師嘅意見係佢嘅手指好適合彈，

手指夠長，指頭有肉，指甲又唔係生得好出。

加上佢讚囡囡專注力強，記憶力好，

令我更有信心比佢試下。

除咗第一堂試堂我可以入去全程睇， 

之後正式堂我只可以最後5分鐘入去，

遲啲就冇得聽。

聽落好似唔多好...又唔知個女學成點？又唔知佢應該練習啲乜？

但老師解釋我知，

唔係個個學生嘅家長都冇得入，主要係睇番小朋友

由於佢覺得阿女可以handle到，

而且比佢自己試，唔駛依賴媽咪幫手，

咁會學得快啲。

不過我似終都有啲唔放心，

所以練琴嘅第一次，

我暫時都會跟埋入去聽（我自己鋼琴底所以聽音冇問題）

跟住就由囡囡自己練。

由於囡囡仲細，而且仲係初學，

每次只可以彈半小時，（手指仔頂唔住）

一個星期上一堂加埋練習兩堂，加埋都係個半鐘。

遲少少就可以加多一堂練習即一共兩個鐘。

因為都係啱啱開始學，

唔會買琴住，

但我都有問老師一啲簡單資料，

再上網睇下......真係唔得了......要成三萬五千幾蚊（仲要係做緊特價）

如果唔肯定囡囡係唔係長期有心機學，

都係去琴行練住琴先。

不過每次車程連埋練習都要個半鐘呀...

非常浪費時間！！

屋企有琴就可以慳好多時間。

唉...真係兩難呀...

我都問過租琴，

大約都要成千蚊一個月...... 

二手琴都唔平......

我仲未諗掂條數呀。

唔理咁多，

再過幾個月先諗啦～～

先睇下囡囡第一堂學咗啲咩先～～

幾開心呢～～夢想成真喎～～

第一堂後第一次練習。

只學單手撥弦，學了Mary has a little lamb。

第二堂就要雙手一齊撥弦。

第三堂學嘅有啲唔同，要左右手一齊用。

 同埋主力練習用三隻手指發力。

豎琴係唔會用尾指㗎，因為冇力嘛。

其實每次練習完， 手指仔都會超痛。

老師話起碼半年後就會好啲。

今次因為係囡囡自己要求學，

所以就算幾痛都會死忍。

好！！媽咪一定會十卜到底！

最多返屋企再塗啲lotion潤一潤(^｡^)

我會盡量寫下囡囡學豎琴嘅趣事（可能對佢係苦事...(¬_¬))

等佢大個睇番啦～～

鄉村娃娃～～孖生姊妹與斗斗

鄉村娃娃～～孖生姊妹與斗斗

文章日期：07/16/2013 12:56 pm

嘢對孖生妹妹係由老師嗰度買材料包做的， 
每個用了約兩天時間便完成。
之所以買哩個材料包，
係因為上星期間帶咗妹妹去睇老師嘅作品展，
妹妹一見哩個公仔就好鍾意，
所以材料包就帶咗返屋企～～
跟住佢又日日同我催我做好未，
比佢催到我裙甩褲甩呀～～
最後咪開turbo做好佢囉～～
見到妹妹咁鍾意，我都好開心㗎！！

睇下兩姊妹同斗斗嘅合照，
斗斗可能都分唔出邊個係家姐，邊個係妹妹呀不過佢好乖，只係搵隻手摸下個公仔就冇掂喇～～
如果整爛咗，阿妹實唔放過斗斗呀～～（唔餵斗斗食佢心愛嘅小食）

不過有個唔好嘅消息，
就係佢地遲啲要分開，
因為妹妹想送一個比佢一年級班主任，
佢話好掛住班主任喎～
我雖然好唔捨得，
但最緊要佢鍾意啦～～

因為新工人姐姐已到，
暫時同仔女都夾到，
工人姐姐亦好錫佢，
所以我可以有多啲時間做番手作～～
黎緊仲會去上堂，
學多啲唔同嘅技巧～～
諗起就開心～～

歡迎大家上Bullbull自家廚房留言比我～～

大塚家的小灰灰 at 07/17/2013 04:13 pm comment

靚女0牙～　小灰灰最鐘意睇靚女　～　

beandogsnow at 07/17/2013 05:41 pm reply

可惜佢地要分開～～

囡囡生病了～～

上星期五，
囡囡的學校打黎話佢有少少燒。
跟住返到屋企沈睡後越黎越暈，
嗱嗱聲帶佢睇急症。
醫生發現佢血含氧度低，
引致佢呼吸有困難。
結果當然要即時入醫啦。
照埋肺，發現係支氣管和肺炎...
就係咁我留連續四日留在醫院全天候陪伴...
瞓咗幾晚，條腰骨好似唔係自己，
加上完全冇得瞓，
攪到持續性頭痛...（死得）

不過好彩有媽咪幫手，
我可以每日有幾個鐘返屋企疏洗。
另外有老公車出車入，
咁先冇咁辛苦。

雖然係咁，
最緊要囡囡冇事。
而家精神好咗好多，
但仍要留在家中休息。
希望佢快啲好番啦～～
唉...又唔見幾両肉，
又要諗吓煲啲咩比佢飲同佢補下先～～

ABC cooking studio 和熊本縣合辦～做太卷

而家先出哩個post好似遲咗好多呀，

不過冇法子啦，

先前阿女中耳炎，

再到阿仔感冒要去學校接佢放學睇醫生，

跟手再傳染埋比我，

病到我死死下，

攪到我邊有心機寫blog喎。

之但係，

我又好想分享今次嘅event喎，

所以遲啲出都唔緊要啦～～

哈哈...今次ABC cooking studio 和熊本縣合辦，

主要係推廣熊本縣出名嘅白米。

對於我黎講，最大吸引力當然係熊本熊Kumamon啦！！！

我上次去日本個陣，

都有買Kamamon熊仔pattern嘅布，

諗住縫番個袋比自己用嘛。

今次整個event係45分鐘。

費用全免（仲可以又食又拎添）。

咁啱我去ABC上堂嗰陣，

田丸老師問我有冇興趣參加，

我當然冇問題啦～～

去到studio，

我發覺佢地安排比我個位超正呀！！

就好似係第一排正中，

直頭對到正熊本熊，

前面冇嘢遮擋。

影靚相無難度呀！

而家先追擊場實況先～～

等到頸長埋，熊本熊終於都到。

其實佢好準時㗎，只係我地好心急咋（笑）

佢一同我地打照呼，大家已經情緒高漲喇！

黎到介紹完後，就開始準備今日要做嘅事～做太卷。

熊本熊好威水㗎，有個日本姐姐專人服侍，

仲有埋私火手套戴住。

睇下唔駛1分鐘就攪掂。

睇下佢個相幾得戚～～擺晒post比我地影相。

首先由大西老師開始示範。

熊本熊都有專心聽㗎，最後仲自己捲好唔駛老師幫忙。

哈哈...成功咗當然又要擺番個戚樣啦！

我地捲個陣，佢仲成日走過黎撩我地，

攪到想專心捲都唔得呀～～（不過我冇嬲佢㗎，嘻嘻...)

最左手邊嘅就係我捲㗎，用咗熊本縣嘅白米，

捲起個型好靚，食落仲好好味（勁多料呀！）

做完太卷後原來仲有禮物收！

一包有熊本熊做嘜頭嘅日本米送比我地～～

睇下熊本熊幾surprise，見到自己個樣靚你咗咁多。

當然唔止得白米咁簡單，仲有保暖杯、襟針、擦子膠、環保袋。

日本人連米都用個靚盒包裝，真係唔捨得食呀！

個杯已經比個仔霸咗喇。

妹妹就要襟針和擦子膠（擦子膠唔記得影添）

仲有張好詳細教我地點熊本縣白米嘅說明書。

今次ABC cooking studio 和熊本縣合辦嘅活動，

真係好好玩呀，

又食又拎簡直滿載而歸。

希望佢地遲啲攪多啲類似嘅活動，

下次有機會一定會帶埋我兩個小朋友去一齊玩～～

歡迎大家上Bullbull自家廚房留言比我～～

Macau 美食之旅 ＋百日宴

Macau 美食之旅 ＋百日宴

文章日期：08/03/2013 01:00 pm

今次去澳門係有特別原因～～
就係老公朋友嘅囡囡擺百日宴。
滿月酒就去過，但真係未試過參加百日宴，
仲要係請過三佰人嘅百日宴。

但我都幾黑仔，
去之前一日開始喉嚨痛，
去到第一日已經痛到冇晒心機，
不停食喉糖都唔掂，
吞口水辛苦到漂汗。
但唔去澳門唔得喎，
因為阿DO訂咗酒店，
仲要帶埋兩個小朋友去。
如果去唔到，大家就好掃興！！
所以唯有頂硬上啦～

去到游咗水玩埋沙，
跟手就去食晚餐。
今次唔係一般嘅遊客區嘅餐廳， 
而係去朋友屋企人開嘅local 餐廳食地道嘢。
真係好味到不得了，
唔怪得多人到嚇親我，
我地要等到八點半先有位坐咋！

以上係其中一部份嘅食物，味味都咁正！！我就算痛住都要食呀！！
最後真係要多謝阿DO嘅朋友，我地想埋單個陣先知佢話要請我地。食完飯仲叫我地打電話比佢等佢開車黎接我地返酒店（怕我地截唔到的士）。
跟手仲請埋我地去食糖水。

而百日宴就去君悅擺。
一般滿月酒都係擺幾圍，佢地就擺足三十幾圍。

有紅雞蛋食呀～～

右上角嘅粉紅蛋糕係主人家嘅朋友特別做黎送比小公主（即主角）
食物實在太豐富，又生蠔又龍蝦又三文魚...，平時食buffet都要排隊拎，而家全部無限量供應，refill又快，等都唔駛等。

最令人驚喜係有個甜品部藏於ballroom內，食到一半音樂響起，布簾徐徐拉起，成個甜品部出現喺眼前，
長長嘅table擺滿晒甜品，大家直頭失控呀！
君悅的甜品果然係名不虛傳，同香港一樣咁正！！

食咗咁多美食之後嘅後果係....扁桃腺發炎，食咗一個星期抗生素都未好得番，
再睇多一次醫生再食藥仍未完全康復......慘慘慘......









歡迎大家上Bullbull自家廚房留言比我～～

Mr & Mrs Leung at 08/09/2013 10:35 am comment

真誇張呀, 有錢人

beandogsnow at 08/09/2013 10:48 am reply

可能係屋企第一個小朋友，大家都會好錫佢，擺多幾位開心吓～～

露絲小姑娘手作室 at 08/03/2013 11:34 pm comment

好好味喎~ 見你耐唔耐都去澳門, 鍾情澳門呀你???

beandogsnow at 08/04/2013 01:40 pm reply

其實我都唔係成日去，但每次都起碼會去一次，就係澳門賽車，事關老公鍾意睇，我咪湊熱鬧去埋睇囉。

大驚喜～～Samsung Galaxy Note 3 和 LC心心煲

繼上次Samsung S3後， 

今日又收到阿DO送嘅 note3, 

仲係白色，真係十分開心～～ 

其實部s3都開始壞， 好多時都miss call。 

可能因為嘅個原因，

阿DO打比我， 我又聽唔到， 

佢擔心我有乜事， 所以嗱嗱聲買過部新嘅比我。 

又講番我今早起床， 發現床邊有個橙盒， 

哩個盒我一見已經發光啦～～ 

再拆開睇， 原來係我至愛嘅LC粉紅心心煲， 嘩嘩嘩！！！ 

係佢由日本訂返黎， 我直頭笑到棚牙差唔多甩～～ 

我又要好忙喇， 要諗諗用花花煲煮啲乜好。

煲煲越睇越靚～～

我之前已經有cp花花煲，哩兩個加埋咪‘花心煲’哈哈...

白色皮底，好高貴呀～～

因為之前用開s3，而家改用note3，覺得個screen好大呀！

今晚我實開心到瞓唔著......

                  歡迎大家上Bullbull自家廚房留言比我～～