Toshiba～ER﹣GD400水波爐 （試機～明太子芝士包＋自家蘋果鮮酵母）

到手喇～

免費嘅水波爐終於送到我家。

其實我一直都擔心會收唔到，

事關我去咗日本8日，

驚收唔到call又唔送黎要再等多一個月...

好彩最後都收到。

返到香港冇時間即時用，

等咗幾日先 有時間試機。

另外我要先多謝我個朋友，

哩幾日唔喺香港佢幫我養住啲酵母，

冇佢幫手一定死晒。

哩部機點解會免費？

因為我儲印花夠30個，

ABC就免費送咗個水波爐比我囉～～

哩部型號ER﹣GD400，

日本已經好早推出，

而香港代理最近都引入，

用行貨都OK㗎，有保養，

雖然冇而家日本新推出嘅水波爐咁多功能，

但對於我黎講已經夠用啦。

部機都幾深，比我以前個P仔三頻仲要大。

size:W500xD497xH398

容量：31公升 

七種功能：烤焗、燒烤、微波、純蒸氣烹調、變頻式烹調、

過熱水蒸氣烹調及熱風對流烹調 

首先試用發酵功能，先用40度發酵。

今次我用咗自家制嘅蘋果鮮酵母，麵包做起放幾日都仲會軟熟。

食落仲好香～～

用埋Bosch M8幫手打麵糰，快而準！

經過兩次發酵和做型後，

準備好入爐了。

我用咗今次去日本朋友送比我嘅明太子醬，

有少少辣，好惹味。

用咗190度先焗咗9分鐘，

轉一轉盤方向，再焗多3分鐘，

令受熱更平均，

焗起顏色唔錯喎。

所以話用鮮酵母做嘅包真係唔同啲，

撕出黎睇下，軟熟到...

Toshiba仲送咗一本好厚彩色使用說書和食譜

跟住做都有排你玩呀。

值得一讚，

書中提到嘅step好清楚，

新手跟住做一定冇問題。

等我稍後時間再試用埋純蒸功能， 

可以順便同miele蒸爐比較一下～～

Miele 電蒸爐美食篇 ～ 菜胆雞

Miele 電蒸爐美食篇 ～ 菜胆雞

文章日期：02/25/2013 08:17 pm

先前我已經用過Miele去蒸雞，

效果真係very good，

滑一滑，我諗如果我下次買隻新鮮雞咪好食到飛起～～

不過而家啲新鮮雞鬼死咁貴，

唔係特別日子，

我都唔會買。

所以而家最經常買就係冰鮮雞，

用Miele蒸出黎就一定唔會失禮人。

今次我唔食白切喇，

改改款食菜胆雞。

真係冇講大話，蒸起滑一滑，幾有光澤～

唔好意思，斬得麻麻地靚仔，

不過都擺到個型出黎～～

睇下，雖然係冰鮮雞但一啲都唔失禮㗎～～

歡迎大家上Bullbull自家廚房留言比我～～

yu at 06/01/2013 01:35 pm comment

同酒樓一樣呀!!!

AirFryer - 焗杯杯蛋糕

AirFryer - 焗杯杯蛋糕

文章日期：03/04/2013 02:53 pm

星期六帶囡囡去學芭蕾舞，

行過包包舖佢指住啲瑞士卷話想食，

但見到一舊要成四十幾蚊，

所以都係返屋企焗條比佢食算喇。

慳番啲錢嘛～～

但係份量好似多啲啲，

咁當然唔好浪費啦，

搵啲紙杯出黎用airfryer焗埋佢，

一様咁好食～～

阿囡非常鍾意食～～

我先preheat180度，焗5mins，

但又怕會燶，所以改為160度焗多約10mins （其實我大約咋，因為冇特別留意時間），

可以插枝針睇下有冇粉漿有黏住，冇就OK喇）

歡迎大家上Bullbull自家廚房留言比我～～

Middy at 04/23/2013 11:50 pm comment

唔好意思，唔知你可唔可以比呢個muffin 的食譜我，和詳細焗幾耐呀？因為我都係剛買這個airfryer , 但我都想整呢個啊！謝謝。

beandogsnow at 04/24/2013 10:53 am reply

其實哩個蛋糕係仔係用埋做瑞士卷剩番嘅粉漿去焗，唔係muffin黎㗎。

Miele 電蒸爐美食篇 ～ 燉冬瓜盅

Miele 電蒸爐美食篇 ～ 燉冬瓜盅

文章日期：05/02/2013 10:00 am

一到夏天，瓜類就最最最當造同新鮮～～
冬瓜呀冬瓜，又見到你喇～～
我好鍾意煲冬瓜粒湯，
清甜又消暑。
去到酒樓食飯，
好多時都會有冬瓜盅，
有啲甚至會特價。
不過食落唔係冇料，
就係啲湯淡茂茂，冇厘聞味。

咁我又有Miele喎，
點解唔自己燉個冬瓜盅嘆吓喎～～
就係咁，我嘭嘭聲走去街市買料煲。

料好容易買到，都係蝦、瘦肉、菇、蟹柳...等，
當然唔少得冬瓜啦！

可以起壇煮飯喇～～

睇下先，用100度燉咗一個半小時後，幾靚～～
足夠一家五口飲（加埋我阿媽）。
阿媽話好夠甜，乜嘢調味都唔駛落。

今次我幫上次LC開倉買落risotto 煲剪彩，唔用燉盅改為成個煲放入去Miele。
啲湯更存氣同好味，完全冇水份流失。

如果屋企要宴客，燉番個冬瓜盅包你全部客人讚歎不已～～
呵呵...


歡迎大家上Bullbull自家廚房留言比我～～

EneriBebe at 05/07/2013 12:21 pm comment

Yeah, yeah! 有Miele就要整多D燉湯潤下，最方便係唔洗睇火吖嘛。 唔知你落清水或雞湯燉呢？

EneriBebe at 05/09/2013 11:20 pm reply

贊吖！😁

beandogsnow at 05/07/2013 01:00 pm reply

一半一半啦，因為完全用晒雞湯會過咸。 我都好鍾意用miele燉湯，唔駛睇火好方便～～

Bosch M8 ~ 流心芝士包 （附食譜)

Bosch M8 ~ 流心芝士包 （附食譜）

文章日期：05/01/2013 10:00 am

唔知點解，最近忽然勁愛整麵包，
日日都係度諗整邊款好，
有時去到好夜都會心癢癢想開機，
會唔會因為換咗Bosch M8，
唔想冷落「佢」，
所以想日日開機？
我諗最大嘅原因係我家三位～皇帝＋小公主＋小王子好捧場！！(^○^)
比我推動力要煮多啲嘢比佢地食～～(^_-)
不過有時我都好慘，只係分得到個半個，
其餘去晒去地個肚入面。

又講番今次焗乜飽先～～
就係。。。。流心芝士包
我屋企小朋友勁like芝士，
今次嘅飽飽最啱佢地食！

嘩...好多芝士呀... <--哩句話就係我兩個小朋友見到個飽嘅第一句話
溶到呢....又軟到呢....唉....我唔知點形容，
總知就一個字～ 正～
早餐阿仔食咗兩個，仲好似未夠喉添。

做嘅過程唔太難，只係要小時留意飽飽面嘅芝士，唔好比佢燶。

同埋隔日食都要放入airfryer160度焗番4分鐘，咁先會流心㗎！

流心芝士飽食譜：（參考自自家製手作麵包）

高筋粉 250g
乾酵母 6g
蛋30g
無鹽牛油 24g
水 90g
糖 30g
鹽2g

做法：
1.已發了第二次嘅麵糰（約12個），每個放入半塊片裝芝士。
2.麵包面上灑上mozzarella芝士，用 180度焗15-18分鐘。（留意最後幾分鐘，小心芝士會燶）

＊＊每次食可以用airfryer 160度焗4mins，包包流心仲好味＊＊


歡迎大家上Bullbull自家廚房留言比我～～

Eunice at 05/18/2013 11:18 am comment

你好，正上網找有關M8的資料，請問係由開始打麵糰至成薄模打了幾耐，同用幾多度，而之後又等幾耐發醇呢？謝謝

beandogsnow at 05/20/2013 12:19 pm reply

我一般會用2度半打麵糰，大約打十多分鐘已經可以見到起模，如果要手套模，就要打半個多小時喇。發酵我係用Miele蒸爐，45mins - 60mins （視乎用幾多yeast）。

Vitantonio鬆餅機～ 心太軟（附食譜）

V仔成為我家成員後，

真係好忙呀，

完全冇時停......

自己真係越黎越鍾意「佢」，

咸點甜點樣樣得！

今日又參考日本cookbook，

做家人最愛嘅心太軟～～

用V仔，焗嘅時間只需要2分鐘就食得，

快靚正呀！

好啦，同大家分享下食譜先～～

朱古力40g，我用咗70%朱古力（35g)+牛奶朱古力(5g)

鍾意甜啲就加多啲牛奶朱古力啦。

低筋粉15g(要過篩）

糖35g

蛋一隻（50至55g)

牛油35g

首先隔熱水助溶朱古力

加入牛油攪勻，備用

雞蛋打勻，加入糖攪至奶白色

加入先前已準備好的朱古力漿

再加入已過篩嘅低筋粉

攪勻。

掃油熱機，加入朱古力漿

焗2分鐘至2分半鐘

可以再灑上糖霜（我冇加，阿DO已拿拿聲趕住食）

流心，真係正！

所以話，

如果大家有興趣想買waffle機，

真係強力推薦買Vitantonio，

不過就必須要忍受隻牛仔囉～～

歡迎大家上Bullbull自家廚房留言比我～～

Bosch M8 ~ 士多啤梨煉奶包（附食譜）

今期網絡大熱嘅包非佢莫屬啦！！

～香濃煉乳包～

我咁追上潮流當然都要跟埋去做啦～～

（實際係想減壓，小朋大嘅考試令我快死喇...慘）

啱啱年頭去完日本，

買咗支士多啤梨煉奶返黎都未用過，

決定今次用佢啦！！

不過我冇手搓呀，

改咗用Bosch M8，

乾手淨腳嘛....

要趕起喺小朋友放學前完成，

唔想影響溫習時間呀。

就係咁，

我用咗最快速度去做哩款包。

其實哩款包同一般包做法一樣，

只係造型唔同，

佢係要切開一片片放入模焗。

去片....

成品真係好似一個皇冠㗎～～

好得意嘅做法，要切開一片片放入戚風模內。

發了25分鐘之後...

我就係用咗哩一支士多啤梨煉奶。

用170度焗23分鐘。

漲起喇～～

金黃色好靚仔～～

因我今次我用埋白馬粉，所以焗出黎好雪白，而且仲好香好軟～～

士多啤梨煉奶食譜： 參照：肉桂打噴嚏

材料：

高筋麵粉 200g

糖 20g

鹽 3g

即溶酵母粉 3g

煉奶 25g （我用了士多啤梨味煉奶）

牛奶 130g (因為我用白馬，要加多牛奶，約1﹣2湯匙）

無鹽牛油 20g

杏仁碎 適量

塗在麵糰上：

煉奶 20g （我用了士多啤梨味煉奶）

室溫無鹽牛油 20g

＊預先把兩者攪勻，備用。＊

做法：

1. 把所有材料混合，用M8打成麵糰。

2. 用40度發酵25分鐘。

3. 拿出用木檊壓成四方型。

4. 在麵糰上塗上已預先攪好的煉奶和牛油。

5. 切成四行，再把麵糰疊高。再切成8等份。

6. 平均放入戚風模（模要預先抹油）內。

7. 用40度再發20分鐘。

8. 焗爐200度preheat，已發好的麵糰先灑上杏仁碎，再以170度焗約23分鐘。

9. 拿出，凍後可以灑上糖霜。

歡迎大家上Bullbull自家廚房留言比我～～

囡囡生病了～～

上星期五，
囡囡的學校打黎話佢有少少燒。
跟住返到屋企沈睡後越黎越暈，
嗱嗱聲帶佢睇急症。
醫生發現佢血含氧度低，
引致佢呼吸有困難。
結果當然要即時入醫啦。
照埋肺，發現係支氣管和肺炎...
就係咁我留連續四日留在醫院全天候陪伴...
瞓咗幾晚，條腰骨好似唔係自己，
加上完全冇得瞓，
攪到持續性頭痛...（死得）

不過好彩有媽咪幫手，
我可以每日有幾個鐘返屋企疏洗。
另外有老公車出車入，
咁先冇咁辛苦。

雖然係咁，
最緊要囡囡冇事。
而家精神好咗好多，
但仍要留在家中休息。
希望佢快啲好番啦～～
唉...又唔見幾両肉，
又要諗吓煲啲咩比佢飲同佢補下先～～