Le Creuset Bis ~ 西班牙冬甩 (Churro) 附食譜

月頭post咗上FB嘅西班牙冬甩見到大家反應好熱烈呀，

亦有谷友問我可可post食譜。

終於忙完小朋友嘅考試，

有時間補番之前應承過嘅食譜。

希望唔會太遲啦～～

材料同做法非常簡單，

但就記得要炸起盡快食，

凍咗感覺好油，唔好味㗎～～

比小朋友做小食就最好，

佢地食得又快，

食完補充體力可以再溫過書。

西班牙冬甩開 Churro (By Fung Gloria ) 參考自網上食譜

材料：

中筋粉（all purpose flour） 100g 

牛奶 150ml

無鹽牛油 20g

鹽 少許

雞蛋 1隻（先拂勻）

雲尼拿香油 數滴

肉桂粉 1tsp ＜﹣﹣
                                  預先攪勻

幼沙糖 1Tsp ＜﹣﹣

做法：

1.  先把牛奶倒鍋中，再加入牛油，用中火煮至微滾（切密大滾），加入已篩好的中筋粉， 攪勻。

2. 分幾次加入已拂好之雞蛋。留意每次必須要攪勻才繼續加。如果覺得粉漿太乾，可以額外逐少加入蛋汁（約1tsp）。

3. 灑上少許鹽，再加入雲尼拿香油。

4. 預先剪好牛油紙 （size 視乎你想整幾長幾闊）

5.    把粉漿唧在牛油紙上。

6.     預備滾油至170度，放入已唧好的粉漿，切勿一次過放在太多。炸至金黃色便可以拿出，隔油。趁暖加入肉桂粉和幼沙糖。即成。

＊  ＊可以改用低粉（質感會較鬆），或高粉（質感會硬身）＊＊

＊  ＊食時可以拌入朱古力漿＊＊

＊  ＊做好要即時食，放隔夜會變淋，唔好食。＊＊

      ＊  ＊最好先炸一兩舊，檢查一下熟唔熟。＊＊

歡迎大家上Bullbull自家廚房-Private Kitchen留言比我～～

Toshibi 水波爐GD400 ~ 扒房湯種牛油小餐包 （附食譜）

細細個去扒房食飯，

真係一件好開心嘅事～～

點解咁開心...

原因係因為我阿媽佢只鍾意飲茶，

唔多like食西餐。

咁啱酒樓旁邊有間西餐廳，

次次跟住阿媽去到酒樓門口，

都好想（係熱切嗰種）佢會轉彎過去隔離...

之但係......失望居多......（諗起就傷感）

不過雖然係失望多，但重會有幾次係成功嘅! (笑晒口）

哈哈......隨住自己大個咗，

爭取成功嘅機會多咗呀！！

弊傢伙，好似離咗題添～～

講番個餐包先...

我好鬼死like嗰啲牛油小餐包㗎！

紅湯和白湯，

我次次都揀紅！！

配埋牛油餐包（成舊牛油放晒落個包），

好好好好食呀！！！（流ing口水）

到我識做包，

都會自己做下～～

間唔中都會上網睇下人地嗰啲...

今次無意中見到有個食譜係用湯種，

所以想試下做～（師兄烘焙煮教室）

先參考佢嘅食譜，再自已試溫度和時間。

結果當然成功啦。

我成日都同朋友講，

食譜係要自已消化改良，

唔好死跟，

大家爐溫又唔同，

麵粉牌子又唔同，

真係要試下先知邊個份量啱自己。

扒房湯種牛油小餐包

食譜份量如下： （參考自師兄烘焙煮教室）

高筋粉 250g (我用流淚粉）

糖 25g

鹽 2g

鍊奶 40g

暖牛奶40ml （唔好過42度呀）

淡忌廉 35ml

蛋1隻（或52g)

快速酵母 3g

湯種 50g
無鹽牛油 30g

提子乾適量 （但我冇加，因為屋企冇呀）

湯種做法：

把50g 高筋粉加入250ml 水。

用細火加熱，不停攪勻，至杰身，

用蛋拂攪時會見到紋便可以停。

用保鮮紙蓋在湯種面（黏實），

以避免吹乾。

可保存2至3日。

如見到面有灰色便不能用了。

麵包做法：

1. 把所有材料放入大盤內。(糖、快速酵母、暖牛奶、牛油除外）
2. 再加入糖，在糖的上面放入酵母，再在酵母上倒入暖牛奶。（令酵母發酵更理想）
3. 用Bosch M8廚師機先打至成糰，再加入牛油打至光滑。（我大約打了十多分鐘）
4. 第一次發酵40度45分鐘。（至兩倍大）
5. 拿出排氣，分成9個（我今次每個57.5g)
6. 醒麵糰10分鐘，再次排氣，搓圓，放入方型盤內。
（因為我用咗脫模劑，所以唔駛加牛油紙）
7. 噴水後用濕布蓋著第二次發酵用40度發40分鐘。（至兩倍大）
8. 預熱焗爐180度。
（因為我用Toshibo水波爐，所以preheat時間好短，
如果用普通焗爐就要早啲preheat喇。）
9. 第二次發酵完畢，在麵糰表面掃上全蛋汁（不用太厚，會容易焗燶）
10. 入爐180度先焗10分鐘， 再轉160度焗7分鐘。
11. 焗好後要盡快脫模，攤凍。
12. 加入厚切牛油或果醬，非常可口。

圖中是第二次發酵後，等待掃蛋汁。

小餐包表面光滑，顏色也很多漂亮呢！！

每個都好夠份量。

撕開後，是一梳梳的，軟熟到不得了～～

就算冇廚師機都可以用手搓，

只係要搓耐少少， 

因為今次個小餐包麵糰較濕～～

下次有時間再打番先前facebook個超鬆軟鍊奶包嘅食譜～～

後記＊＊即日下午～～真係忍唔到呀，點都要再食多過，厚牛油實肥C啦＊＊

幾日後...我又整喇～～

上次第一次發酵完唔記得影相，今次整就我記得補番～～

我等，我等，我等等等.......40分鐘後

搽蛋漿先...圓轆轆，好飽滿。

出爐... 我發覺上次搽日本蛋漿，

焗出黎嘅色水比今次用 泰國蛋漿靚。

anyway...超正餐包食得！！！

一陣會夾塊和牛免治做漢煲。

歡迎大家上Bullbull自家廚房留言比我～～

沙樂美腸菠蘿煙三文魚Pizza（附食譜）

阿仔最近好鍾意食西式嘢，

除咗成日要我慢煮牛扒外，

pizza都係佢熱點之一。

我好多時都會焗咗個批底，

再冷藏好，到食先拎出黎加餡，

簡單方便。

Pizza一出，基本上唔駛叫阿仔已經可以食晒半個～～

哈哈......懶人之選。

我今次用普通焗盤，

其實Le creuset 22 buffet都好適合做pizza，

隨大家喜歡啦～～

材枓：

高粉70g

低粉130g

鹽 3g

糖 3g

牛油20g

即溶酵母 4g

溫水 110g （牛奶也可以）

第一次發40分鐘，拿出把空氣壓出，醒麵糰10分鐘。

再壓成圓型，放些Mozzarella cheese在邊位做芝心批～～

第二次發酵15分鐘，掃油，在批底吉窿入爐 200度焗至金黃色（約8分鐘）。

餡料隨自己喜歡啦～～

我就加咗沙樂美腸、菠蘿粒、煙三文魚。

180度焗15分鐘食得！

我屋企人比較鍾意用千島醬，

好食過茄醬。

歡迎大家上Bullbull自家廚房留言比我～～

Natalie豎琴日誌（第七個月）Harp Exam 二級考試仲有兩日就到了～～

好耐冇update囡囡學豎琴嘅情況，

唔係懶，而係真係好忙，

攪到連blog都冇咩時間寫。

阿女而同我一樣，剛剛兩星期前先完成學校測驗週，

但因為豎琴考試快到（後日15/5/2015就係喇），

所以每日都努力練習，

彈到手指仔痛都要繼續～～

講起學琴，

由上年10月1日到而家已經七個月了，

時間過得好快，

當時佢只係彈緊啲好簡單嘅歌仔到而家要彈二級歌，

轉變很大，

屋企而家日日播嘅歌（即佢而家每天在家中練習嘅歌），

都變得比以前複雜。

不過阿女似乎越難彈佢就越鍾意彈，

佢話冇咁悶喎...(¬_¬)

不過最近兩個月都彈三首歌，佢有時都會覺得好悶...（我都係呀），

之但過咗今個星期，其中一首仍要繼續練習，

事關佢參加咗學校才藝比賽入了決賽，

就係用其中一首考試歌去比賽囉。

諗起又要搬琴返學校就頭痛......

上次搵人搬要1200蚊呀，

為咗慳錢，今次搵咗細佬幫手......

先同大家分享第一首：

唔好意思，因為可能我錄音時按住個mic，

所以音樂聲較細。

哩首講求快同流動性，哩個version仲未係最快～～

帶有神秘色彩和印度feel，

阿女最鍾意彈。

哩首係最先學嘅歌，阿女話係三首中最難彈，

因為又要快又要連貫性。

佢都係用哩一首參加學校才藝比賽。

我已經keep住聽咗1個半月了。（暈）

預備功夫已經做足，

希望星期五佢唔好咁緊張啦，

用番平時嘅表現，

應該唔會有好大問題～～

阿女加油呀！！！

第一次學人做糖皮玫瑰花cupcake／Wilton course 1 畢業之作

有睇開我blog嘅卜友仔都知我最近好意做蛋糕裝飾。

我先前都報咗學wilton course 1 並已經完成了。

而家正在開始course 2...

用buttercream做裝飾唔算好難，

但真係要唧得多花花先會靚。

所以我而家一有時間就打定啲cream用黎慢慢練。

先同大家分享番之前做嘅wilton course 1畢業蛋糕

由於當日我剛剛從日本坐淩晨機返香港，

跟住就即刻撲返屋企打butter cream，

趕到我地地下，

所以畢業蛋糕冇時間特別設計， 

只係簡簡單單唧上漸變色玫瑰花圖案咋。

亦由於我成個星期唔喺香港，

都冇練習過，

所以今次唔係唧得好靚，

不過自己已經比咗最大心機去做，

老師都話唔錯～～

近鏡～～

哩個係第二堂做的， 

主要係學習唧星形花花和圖案轉移。

老師要求我地嘅星形花花要平均，側面睇都唔可以粒大粒細。

拎到返屋企最開心係阿女，佢好like哩隻熊㗎！！

同學仔做嘅蛋糕款公仔係唔係都好可愛呢？

而家開始上course 2了，

第一堂主要教用royal icing唧花，

睇落容易，但實際係好難唧得平均，

收口位好難整得靚。

花花乾咗後，

可以放在蛋糕或cupcake面做裝飾，

唔駛次次只用生果咁悶。

講到糖皮，

其實wilton course 3都會教。

但無意中見到有一間叫Seven Sweets嘅workshop有幾款用糖皮做嘅玫瑰花cupcake真係靚到dum一聲......(雙眼發亮）

所以決定唔等wilton course 3，鼓名上咗先算...(睇我幾心急）。

Seven Sweets位於北角，

好近MTR，

所以交通好方便㗎～～

今次嘅course係星期日上，

有小朋友嘅卜友一定明白weekends係家長最忙，

但唔理得咁多，

搵阿Do 睇住兩個細，

我就「鼠」出去上堂先。

不過我都要特別鳴謝阿Do車埋我出去上堂。

同學仔們都非常準時， 

大家未夠鐘已經可以開始了～～

細心嘅老師預先已經為我地準備好所需材料各工具。

每人都會有支水、圍裙，又有埋名，唔怕坐錯位。

先睇下我做嘅成品～～

係唔係都好靚呢？

一次過學晒4款裝飾，你話係唔係抵上呢！！

因為玫瑰花花芯要等乾，所以大家會先做好。

由於我對糖皮係零知識，

所以好多謝老師細心嘅講解。

睇下盛放開嘅玫瑰花...經過老師嘅修飾，

即時再開得靚啲呢！！

個人覺得壓花瓣都幾難攪...大力得滯又會太曲，唔夠力又冇紋...

仲要壓成十幾塊...汗都出埋呀。

有兩個cupcake面我用咗Tiffany blue，

另外兩個用淺藍。

那些小白花都用模壓出黎，好似真呀 。

小玫瑰花我就得唔難做，

好快就完成。

做蝴蝶結原來要做到有立體感係有技巧，唔上過堂都唔知。

用模做嘅，簡單又靚，

成寫咩字都得～～

今次由12點開始上到5點呀，

做糖皮花真係唔簡單，

小小嘅花朵都要用好多時間先做得好，

完全係心機之作！！

我都打算我個女生日時（佢仲有排都未到），

開生日會送個糖皮蛋糕比佢。

而家仲有時間努力練習，

到時再post比大家睇下我嘅傑作㕸～～

歡迎大家上Bullbull自家廚房留言比我～～

新玩具到～～ ANOVA sous vide低溫慢煮機 （慢煮溫泉蛋、腩排和牛扒）

慢煮哩家嘢我都時不時會玩，

用Miele steam oven慢煮三文魚，

之前都有post過食譜上黎。

但最近我又迷上另一部家用式低溫慢煮機，（台灣叫舒肥低溫恆煮機）

牌子叫： ANOVA

啱啱網上做緊特價，

所以嗱嗱聲訂番香港囉～～

慢煮嘅好處係可以用50至80度嘅水溫，

將放在抽真空袋嘅食物用一段時間低溫煮熟。

取出後再用大火略煎便可以上碟。

做出黎嘅水準，真係同酒店有得揮。

另外我仲買埋Sous Vide supreme 抽真空機，

其實先前都有個韓國牌子，

用黎抽乾果類嘅食物效果好好，

但抽有汁嘅肉類就麻麻地，

攪到成機血水或汁。

我見好多人都會用密實袋，

但個人覺得要慢煮十幾個鐘，

用膠袋好似唔係咁安全。

裡面包埋12個真空袋

當全部嘢準備就緒後...

可以開始喇～～

由美國訂返黎，3日已經到屋企喇～～

包裝係圓筒型，未拆開都唔知係乜東東？？

圖中上面數字係會不停跳至你選擇嘅溫度。

攝氏或華氏都可以。

另外亦接駁到手機藍牙，

隨時預較煮食時間和溫度。

提供嘅配件可以將慢煮機安裝在任何煲內（高身）， 

到咗預設嘅溫度後就會響，

提示你要放入食物。

跟住就乜都唔駛點理。

但如果要慢煮十幾二十個鐘，

就必須要中途加水。

收到貨後大部份人都會做溫泉蛋試下（我都唔例外）

我用63C 煮50分鐘。溫泉蛋完成～～

只係加咗少少豉油已經好夠味。

如果想再熟啲，就自己加時間喇～～

跟住到慢煮牛扒，

先用抽真空袋包好，

用了55C慢煮45分鐘（牛扒厚1.5cm)

拎出黎之後，

燒紅個pan，再每邊煎約1分鐘。

切開睇睇，裡面粉紅色，唔會標血水，

簡直係勁呀！！

加埋汁，食落又嫩又滑。

今次我係買紐西蘭肉眼扒，

如果平時就咁煎，都會un少少，

但今次改用慢煮，

食落完全唔同，

唔會失禮添～～

咁唔駛下下買貴牛扒啦！

輪到豬肉，用了75度低溫慢煮5個鐘，跟住再煎靚兩面。

雖然係豬肉，用低溫煮都熟㗎，食落冇渣，又滑，超正！！！

以後請朋友黎食飯，

可以預先慢煮好，

慳好多功夫呢！

另外如果慢煮好嘅食物當日食唔晒，

可以原袋放入雪櫃，

keep到幾日。

而家啱啱係阿仔測驗週早放學，

我都係之前煮埋放入雪櫃，

到佢食午餐叫工人姐姐煎番靚就可以開飯！！

你話幾方便呢～～

我仲試埋三文魚，

都係咁正。

稍後時間會再試埋其他肉類，

有機會再同大家分享～～

歡迎大家上Bullbull自家廚房留言比我～～