IWATANI 日本gas 爐 （海鮮用）新增圖片

上個月從日本回來，

也帶了這部gas爐回來。

其實gas爐屋企都有啦，

點解仲要買多部返黎擺呢？

原因好簡單，

就係燒海鮮都得！（連殼）

事緣我在日本一間食海鮮BBQ嘅餐廳，

食過用哩部爐燒出黎嘅海鮮，

又甜又好味，

令我忍唔住要捧部返香港囉！

哩部gas爐係日本出名嘅Iwatani出品。

價錢大約三佰幾蚊啦，

唔係話好貴， 

用番我地一般打邊爐嘅gas，

好方便。

清洗都幾容易。

 爐嘅size同一般gas爐差唔多。

火力都幾勁～～

睇下我放咗幾多海鮮，

真係好正！！

放心，由於係燒海鮮，

所以油煙唔多，

室內用絕對冇問題。

爐本身有埋個架可以放串燒上去燒。

不過我試過後唔會再在室內燒，實在太大煙！（燒肉只可以室外進行）

不過留意番爐size只適合四人用，

太多人一齊同時用就要等好耐喇～～

**新增圖片**

27/3 剛剛去完日本，次前就係因為試過哩間磯燒海產令到我上癮要買部爐返香港囉！！

而家次次去日本都一定會食，回味無窮！

睇見已經流晒口水。

燒海鮮都有技巧，唔食過都唔知。

味增蟹羔....好好好好食呀！！！

原條尤魚必食～

歡迎大家上Bullbull自家廚房留言比我～～

Natalie 豎琴日誌 （第四個月 ）新琴送到：Lyon & Healy Prelude 40 Harp

睇番自己已經好耐冇update個blog， 

原因簡單，唔係因為懶，

而係太忙...忙住去日本呀！！

十二月份小朋友放聖誕假帶咗佢地兩個去北海道滑雪。

已經好耐冇滑，

阿仔上年要為升中一而奮戰到底，

所以全家人去旅行嘅計劃要壓後...

今次去七日玩餐包！！

最開心係囡囡一個早上已經學識滑雪，（呵呵...佢個老師咪係我囉）

下午已經上初級滑雪道自己玩喇～～

不過返到香港唔夠四日，

我又要同老公再飛東京，

此行係公事，

要幫老公手攪展覽。

講講下，好似講咗我去旅行日誌添～～(⌒-⌒; )

講番正題先～～

先前曾經提及過會為囡囡買一部40弦嘅豎琴，

等呀等...又再等...終於一月尾送到喇～～（比預期快咗一個星期）

點解會咁想部琴送到？！

原因好簡單，

因為花在到琴行練琴嘅時間實在太多，

日日功課又鬼死咁多喎，

去練完返到屋企都五點半，

實在唔夠時間溫習呀！！

阿女又好勤力，連老師都讚佢，

不過佢練少一日又嘈，

唯有頂硬上啦！！

送琴黎嘅師傅好好人，

講解得好清楚。

佢好風趣㗎，

叫我而家好儲定錢，

話阿女好快就會改用另一更大型號嘅Pedal Harp，

最平都要六位數字...（;￣O￣）

睇下部琴有幾大部？

有啲人可能覺得奇怪，

點解唔買細部啲？

其實豎琴考試對豎琴係有限制㗎，

要超過某數量嘅弦線先比考試。

另外我都有帶囡囡親身去 Hong Kong Harp Centre度size和高度，

再聽埋專業人事嘅意見先買哩款L & H Harp，

唔係求其㗎！！！

聽講話而家訂琴，要等到八月先有貨呀...(OMG)

為咗令Natalie舒服啲，

我上個月仲買埋可以調較高度嘅琴櫈（屋企部piano嘅琴櫈冇得調高低）

再放埋腳踏比佢，

即時可以開始練琴。

Natalie的老師仲好盡責又細心，

佢當晚仲過黎我屋企幫我睇下有咩要執。

由於新琴到啲音會唔穩定，

所以頭個幾兩個星期都要調音，

但Natalie仲細，唔夠高又唔夠力，

所以重任唯有交比我啦。

老師教咗我download個apps，

方便我聽住黎調音。

睇佢好容易，

到我自已攪真係好有難度！！

最重要係我左手嘅手指勁痛呀，仲起埋水泡...（嗚..)

我真係好佩服阿女咁忍得...

佢痛到起泡甩皮都唔出聲。

另外仲學埋自已換弦線，

我都發覺得自己好勁呀。（嘻...)

經過4個月嘅練習，

剛剛學咗1級考試歌。

彈得唔係好熟，但都同大家分享下～～

黎緊仲要學三首二級考試歌（4月就考喇），

有咗琴部，

可以慳咗好多時間練習，

阿女你要比心機呀！！！

為囡囡做的糖霜曲奇Part 2 ~ 聖誕樹、雪人、糖果、禮物、鹿仔、聖誕老人、士的糖

先前已經做咗一批糖霜曲奇比囡囡送比小朋友，糖霜曲奇 Part 1 Pls click

因為唔足夠，

所以我又要再做第二round～～

今次同上次一樣，

其中一個模用番上次嘅雪人，

但顏色就轉咗。

曲奇係前幾日首先用Bosch M8打好粉糰，（用M8乾手淨腳呀！！）

再用T仔焗好， （一次過焗兩盤，慳時間）

最後用保鮮紙包好放入密封嘅盒再放雪櫃，

咁就唔怕會變淋。

圖中係由雪櫃拎番出黎攤凍

聖誕樹～當然唔少得啦～～

今次用咗wet on wet technique 唧花，

即係所有花都係趁icing sugar未乾時全部要快手唧好。

乾咗就會好平滑。

哩款technique都唔算太難，

但icing sugar要調較得啱啱好，

太乾或太濕都唔得。

我好鍾意哩一款，

覺得好靚。

士的糖都係用同一方法做。

雪人同之前唔同㗎，

頂帽子架咗朵聖誕難花～～（要細心留意下）

聖誕節當然要有聖誕禮物啦！！

再加埋糖果，幾豐富！！

我個女話送咗粒糖比校長做禮物喎～～

聖誕老人又係有啲唔同，

帽子的白色位置灑上糖，有閃閃嘅感覺。

另外鬍鬚都有啲難度，

好驚唔對稱...(手都震埋）

到鹿仔出場，

哩個鹿仔模係肥版，

有幾隻我仲幫佢加咗頭髮添～～（嘻嘻...)

為咗保存新鮮，

我仲出動埋封口機。

之前再用顏色鐵線索實就可以送比同學仔喇～～

哩個部驟由我個女負責做。

哈哈......成五十塊呀，幾壯觀......

我同囡囡都好興奮～～

今次用咗好多唔同款式和用上唔同嘅顏色，

非常吸引～～

聽囡囡講，同學收到後都好鍾意，

有啲甚至想要兩塊添～～

＊＊＊ 其實今次我仲做多額外十多塊比我朋友嘅姪女，

佢話佢都想帶啲送比同學仔，

哈哈...原來聖誕節真係好多小朋友鍾意收曲奇㗎！！＊＊＊

歡迎大家上Bullbull自家廚房留言比我～～

ABC cooking studio 料理篇 ～ 俄羅斯餐、蘑菇白汁手打意粉、日式鴨胸肉配手打蕎麥麵

又到料理篇，

因為太忙嘅關係，

我而家好多時都會group埋一齊先放上blog，

慳番啲時間。

今次主要係學手搓意粉，

原來都唔容易搓，

粉糰又硬，

要用雙倍力先搓到。

煮完我覺得硬咗啲，

食唔慣呀，

下次煮要再耐啲先夠。

雞扒好簡單，只係用rosemary和蒜片等材料醃。

我最欣賞反而係薯仔，

吸盡雞油，

又香但又超肥！！

之後回家再煮，因冇時間搓粉，

所以用百德XX意粉頂替，

其餘就跟番食譜...好快開到飯。

又到俄羅斯餐～～

其實我前年曾經去過俄羅斯，

食過正宗嘅俄餐，

同哩款係完全唔同。

只係個湯用咗紅菜頭煮，

同埋薯仔上有啲sour cream叫做有啲似咋。

用高麗菜包住免治肉，

再用高壓煲煮幾分鐘，

加埋茄汁（個汁可以用作茄汁意粉）。

隻蛋係多出，

唔好浪費放埋上去食咋。

講真，個湯真係唔多掂，

啲味怪怪，飲兩啖就放棄喇。

薯仔就幾好味～～

個炸包係我地全部人一致讚好！！

又係搓，不過今次係搓蕎麥麵，

仲有鴨胸肉＋汁。

肉碎炆南瓜

甜品係唔係好靚呢～～

原來要吊起黎雪到硬身。

完～～

歡迎大家上Bullbull自家廚房留言比我～～

ABC cooking studio 麵包和蛋糕 ～ 畢業之作 fruit tart 、炸冬甩、炸咖喱包、紅豆和白豆蓉包、焦糖mousse

轉眼間去ABC上堂已經一年了～

蛋糕的Licence也考了呢～～

不過麵包仍在上master course，

料理都係繼續進行中～～

我主要係去K11上堂，

PMQ咁耐只係上過兩堂咋，

似終交通比較唔方便嘛。

上到去感覺很開心，

同啲老師好似朋友，

大家上堂有傾有講，

有時又會認識到新同學。

其實湊小朋友都好有壓力㗎，

上到去可以好好放鬆一下，幾好㗎～～

今次放多幾張相上黎同大家分享下製成品：

畢業之作～Fruit Tart。

又點少得聖誕麵包呢！！（兩個都係㗎）

細個款唔係蛋糕，而係介乎蛋糕和麵包之間嘅口感。

睇真啲質感好軟～～

因為今次麵糰好大舊，又要搓十成，

所以要用好大力氣呀！！

哩款係德國麵包，有啲似Pretzel bread，

睇下顏色係唔係好深呢？

唔係焗燶呀，

而係先用流打水煮過再焗就會有哩種效果。

做型唔難攪，介花先難攪，

唔可以介咁深，

否則焗起會開到好似朵花了～

哩一款炸冬甩和咖喱包絕對係驚喜之作！

用上白神酵母，好香呀！！

金黃色～～

食完實肥幾磅。

自己減少糖霜，

唔想小朋友食得咁甜。

回家一日內食晒，所以再做多一盤（雙倍份量）

唔用糖霜喇，改用砂糖。

（我個人都係鍾意傳統啲用砂糖）

睇下外脆內軟，絕對會食上癮！

仲有紅豆蓉和白豆蓉粟子包

造型非常有和風味道，

好似日式菓子呀！

我唔係咁鍾意食白豆蓉，紅豆蓉啱我多啲！

哩款mousse蛋糕，我囡囡好鍾意食，

我問佢有焦糖（我煮得苦一點）會唔會覺得苦，

佢話唔會，可能因為太甜啦，苦少少反而可以中和啲甜味，

好食！

8件都唔係幾夠分添～～

因為太多相喇，

所以我決定麵包和蛋糕一齊放在一個post內，

料理另外再開post，

有興趣就入黎睇啦～～

歡迎大家上Bullbull自家廚房留言比我～～