AirFryer - 蝦醬焗春雞（附食譜）

AirFryer - 蝦醬焗春雞（附食譜）

文章日期：12/07/2012 12:15 am

今次焗嘅蝦醬焗春雞真係勁勁勁香呀！！！我醃完之後，成間屋都香得好緊要，連我個仔喺房都走出黎問我整緊乜冬冬？
雖然有蝦醬，但食落又唔係話咁重味，但又出奇地好鬼死夾喎～～

睇吓係唔係好金黃呢？焗起如果即時食真係皮脆㗎，不過因為要等埋阿Do放工，已經唔脆，但味道一樣咁好～～小朋友都好鍾意食㗎～～

材料：

甘荀絲毫 1隻 （細size)

洋蔥絲半個 

紅酒 1/4杯

雞湯 1/2杯

醃料：

黑椒粉 1/2tsp

辣椒粉 1/8tsp

蒜粉 2tsp

百里香 1tsp

蝦醬 2大tsp

生抽 2tsp

鹽 1tsp

生油 1Tsp

做法：

1. 先把所有醃料撈勻，再搽在雞的內外，約三小時。

2. 把洋蔥絲和甘荀絲毫炒香，塞入雞的肚內，再用針拮實。

3. 用錫紙封雞的翼尖以防焗燶。

4. Airfryer preheat 180度（5mins)，焗約25mins。（中途要反轉）

汁的做法：

5. 把在雞肚內的洋蔥絲和甘荀絲拿出。

6. 用pan加少許油，把洋蔥絲和甘荀絲充份炒香，再加入紅酒，取後加入雞湯，煮成燒汁。最後把渣隔出。

心得：自己在最後幾分鐘要特別留意雞的表面，因好容易會焗燶。

阿Do食完話一定要再encore，等我遲啲再買隻雞返黎再焗比佢嘆吓先～～ 

歡迎大家上Bullbull自家廚房﹣Private kitchen留言比我～～

CCS at 12/12/2012 05:31 pm comment

HI GLORIA, 你好, 今日發現你這BLOG 真係好開心, 因為我想試這新產品好耐, 只是未見有人用過後的 COMMENT, 不知是否真的咁好用, 現在見你成隻春雞都炸到咁靚, 當堂信心大增, 請問此機清洗容易嗎? 還有什麼地方要特別留意? 多謝你的解答和分享, 我會再細看你各篇網誌食諳的. 並恭喜你創作的食譜獲獎呀, 好叻女

CCS at 12/17/2012 02:37 pm reply

多謝你, 易清潔好緊要, 我最怕似焗爐咁難抹又要舖鍚紙, 好麻煩

beandogsnow at 12/12/2012 10:58 pm reply

多謝你呀，我自己都好surprise可以入到final，我同仔仔都會努力～～ 其實我都只係用咗Airfryer半年，不過用落真係幾好，又方便又快捷。講到清洗問題，我自己去十二蚊店買咗個鋼絲擦（好似牙擦款），專係擦個網，其他易潔部份就係用海棉洗。只要係用完之後用水浸一陣，會容易洗好多。不過頂部發熱線，就唔可以用洗潔精洗，只能用半濕布抹。每次用完抹一下，焗嗰陣就唔會出咁大油煙。

Yolanda at 12/07/2012 07:36 pm comment

每次見到你的 blog 都流哂口水呀

beandogsnow at 12/08/2012 12:01 am reply

呵呵呵.....咁你就要多啲入黎睇喇～～

Natalie豎琴日誌（第一至三堂）

囡囡轉眼間已經三年級了～～ （我又老咗喇～～） 

開學已經三個月，

功課亦比以前忙...(多到令我頭痛（−＿−；））

見到佢有時讀到好辛苦真係幾慘。

所以我一路都係比佢上啲佢有興趣嘅課外活動去減壓，

例如：畫畫、跳芭蕾舞、鋼琴。

但其中有一項課外活動我一路都唔比佢玩...就係豎琴。

豎琴其實係好難學㗎！

因為係用手指撥絃，所以會好痛...唔止痛仲會脫皮。

我就係擔心佢怕痛而三分鐘熱度...所以唔比佢學。

而且學豎琴嘅學費都幾貴㗎...（荷包會好傷）

不過今次見佢好有決心想學，

而且比佢試堂後，

老師嘅意見係佢嘅手指好適合彈，

手指夠長，指頭有肉，指甲又唔係生得好出。

加上佢讚囡囡專注力強，記憶力好，

令我更有信心比佢試下。

除咗第一堂試堂我可以入去全程睇， 

之後正式堂我只可以最後5分鐘入去，

遲啲就冇得聽。

聽落好似唔多好...又唔知個女學成點？又唔知佢應該練習啲乜？

但老師解釋我知，

唔係個個學生嘅家長都冇得入，主要係睇番小朋友

由於佢覺得阿女可以handle到，

而且比佢自己試，唔駛依賴媽咪幫手，

咁會學得快啲。

不過我似終都有啲唔放心，

所以練琴嘅第一次，

我暫時都會跟埋入去聽（我自己鋼琴底所以聽音冇問題）

跟住就由囡囡自己練。

由於囡囡仲細，而且仲係初學，

每次只可以彈半小時，（手指仔頂唔住）

一個星期上一堂加埋練習兩堂，加埋都係個半鐘。

遲少少就可以加多一堂練習即一共兩個鐘。

因為都係啱啱開始學，

唔會買琴住，

但我都有問老師一啲簡單資料，

再上網睇下......真係唔得了......要成三萬五千幾蚊（仲要係做緊特價）

如果唔肯定囡囡係唔係長期有心機學，

都係去琴行練住琴先。

不過每次車程連埋練習都要個半鐘呀...

非常浪費時間！！

屋企有琴就可以慳好多時間。

唉...真係兩難呀...

我都問過租琴，

大約都要成千蚊一個月...... 

二手琴都唔平......

我仲未諗掂條數呀。

唔理咁多，

再過幾個月先諗啦～～

先睇下囡囡第一堂學咗啲咩先～～

幾開心呢～～夢想成真喎～～

第一堂後第一次練習。

只學單手撥弦，學了Mary has a little lamb。

第二堂就要雙手一齊撥弦。

第三堂學嘅有啲唔同，要左右手一齊用。

 同埋主力練習用三隻手指發力。

豎琴係唔會用尾指㗎，因為冇力嘛。

其實每次練習完， 手指仔都會超痛。

老師話起碼半年後就會好啲。

今次因為係囡囡自己要求學，

所以就算幾痛都會死忍。

好！！媽咪一定會十卜到底！

最多返屋企再塗啲lotion潤一潤(^｡^)

我會盡量寫下囡囡學豎琴嘅趣事（可能對佢係苦事...(¬_¬))

等佢大個睇番啦～～

芝士蛋糕～最美味

最近都係主力係做麵包，

好耐都冇焗過蛋糕喇... （懶）

早上起床心癢癢，

好想做過芝士蛋糕食下～～

其實我個人比較偏愛食焗嘅蛋糕，

mousse反而麻麻地（只係其中幾款較喜愛）

所以一見到芝士蛋糕就會兩眼發光...(^o^)

今次搵埋個工人幫手用手機app影咗個video，

唉...其實都係影幾個鏡頭，

我都比個工人激死，

叫佢開始佢又唔開始，

我未準備好佢又撳start...

take咗唔知幾多個shot先攪掂...((~_~;)

之前都有post過，但今次我覺得做得比上次靚！

唔好意思，因為主力影video，

冇乜點影相呀～～

好彩影出黎都見得下人...

我做好冇獨食，

切咗一半比媽咪細佬，

自己一個食晒唔得了呀！

歡迎大家上Bullbull自家廚房﹣Private kitchen留言比我～～

ABC cooking studio Cake master course ~ 白梨蛋糕 Charlotte aux poires

今次學做嘅蛋糕真係好好玩，

唔係話難，

但要好注重細節...

如果唔留意，

個蛋糕邊位就會唔靚。

同埋好玩在可以學下新技巧，

唔駛一味焗完蛋糕，再「吻」cream咁悶。

用咗白梨做，

雖然係罐頭，

都都好甜，

我同同學仔學完後有剩都唔好嘥食埋先走人。

個人覺得好滿意呀。

哈哈...有啲似玩砌圖遊戲。

老師話我知法文Charlotto係指女性嘅帽，

如果蛋糕綁埋絲帶就真係好似頂帽喇～～

中間係類似吉士嘅cream，我自己一口氣食咗兩件～～

影咗個做餅過程比家睇～～

不過仔女就唔係咁鍾意，

佢地覺得甜啲會好味啲喎。

反而佢地好鍾意出面嗰層...因為灑咗糖霜夠甜呀...

歡迎大家上Bullbull自家廚房﹣Private kitchen留言比我～～

ABC cooking studio 料理course ~ 泰式、土耳其、法式料理

除咗學蛋糕和麵包，

當然唔少得料理啦。

最近幾次都係上世界料理多，

嗰幾款日本料理唔係咁啱我食呀。

我學咗包括：泰式、土耳其、法式

先睇下菜式先：

泰式少肉碎飯，少少辣，好惹味。

點少得簡易版冬陰功湯

泰式炸蝦餅就差少少，唔彈牙。自己會改良下。

最後仲有甜品棷汁白玉丸子。

其實土耳其菜係咩呢？

原來係肉丸和香料飯...仲有菠菜。

香料飯可以再濃味啲就更好！！

我自己反而鐘意菠菜面嗰pat乳酪醬汁，好夾㗎。

法式當然唔少得紅酒燴牛肉啦！！

今次就揀咗用牛面珠登，炆起好滑...

佢地用嘅醬汁同我平時唔同，

所以煮起個汁好深色。

哩個汁除咗牛肉外，配雞肉或豬內都得㗎。

薯蓉再加多少少奶去煮會仲正。

尼斯沙律好足料，我真係食唔晒呀......

最後甜品係櫻桃布丁，

又係簡易版，隨時都可以煮比小朋友食。

朋友黎食飯都可以焗黎請客～～

以上咁多款，我最like係紅酒燴牛頰肉，

真係滑㗎，就算換牛尾或牛腩或牛肋條都得！！

唔食薯蓉改麵或飯又得！！

可以大好多唔同煮法，好實用。

下次會煮俄羅斯菜和打蕎麥麵，

到時再post比大家睇下我煮成點啦～～

歡迎大家上Bullbull自家廚房﹣Private kitchen留言比我～～

ABC cooking studio master course ~ 伯爵mousse、吉士puff、黑森林、Begal

最近上咗好幾堂master course，

包括埋蛋糕和麵包。

ABC教嘅cake味道真係唔錯。

但就有啲麻煩，要洗好多工具，

所以次次返屋企再練習時都要等工人姐姐冇放假，

唔係自己有排洗。 

另外好鬼開心，因為終於都取得Basic course嘅証書～～ （笑）

都等咗好耐...差啲都唔記得添～～

今次我一定過放晒幾款master嘅cake和bread同大家分享下先....

Mousse au the et au citron , 個名太長喇，

其實即係伯爵mousse蛋糕。

3層口感，正！！

就咁睇相都知係puff啦～～

不過有兩種口味，原味custard和咖啡custard。

我自己就好surprise， 

因為阿仔唔多like coffee味嘅食物，

但佢今次居然大啖大啖食晒，

仲話要添食，

可以想像真係幾好食㗎～～

 佢地教了用最傳統～櫻桃做到黑森林蛋糕，

其實都算簡單。

最開心係上堂時跟同學仔有講有笑，

可能老師都比我地激死。。。)^o^(

最後係begal， 

好味呀！！

佢地教用白神酵母做，

要好有耐性等發酵....（變化石）

跟住又要先用熱水煮再焗，

比較複雜少少。

焗起煙煙un un， 

夾火腿、生菜、芝士超正！

我就用咗雞蛋沙律夾包和芝士，

同阿DO一人一半，佢食完自己嗰份仲想食埋我， 

我當然唔制啦～～（哈哈）

上堂做begal嘅片段

蛋糕和麵包証書都到手喇～～

超開心呢！！

遲啲再同大家分享我其他蛋糕啦～～

歡迎大家上Bullbull自家廚房Private kitchen留言比我～～

Primada 鵝姐煲 ～ 日式咖喱牛肉 ＋ 西洋菜湯

Primada 鵝姐煲 ～ 日式咖喱牛肉 ＋ 西洋菜湯

文章日期：10/14/2012 09:00 am

哈哈......買咗第二日又再心思思想試吓個鵝姐煲～～
今次就試下煮日式咖喱牛肉和西洋菜湯。
先講日式咖喱牛肉，
我先後曾用 Le Creuset 和WMF高壓煲煮過，
兩者都煮得好好味，
今次用鵝姐煲又會有乜結果呢？

登登登....登.....

先用airfryer焗好啲薯仔，再係鵝姐煲內爆香啲料頭，最後再放入已汞水嘅牛肋條和水，大約用二十多分鐘已經炆好。

跟住開蓋加入咖喱磚，滾到溶晒，熄火食得。

我最後加埋蔥油餅一齊食，好滋味呀！！

阿DO食完都唔知我用新煲煮，佢話同之前煮嘅一樣味。
不過用哩個煲煮係好方便，都唔駛點理已經食得。未食住又可以keep warm，幾好～～

跟住又要試下煲西洋菜湯。
又係洗晒所有材料，放晒入滾水，按「湯」功能。不過覺得唔多夠味，自已再加時間煲。
要用多幾次先可以掌握到～～

味道都幾好，唔駛睇火，最啱我用～～
要鑽研多啲湯款，日日飲都唔怕麻煩。
歡迎大家上Bullbull自家廚房留言比我～～

mrschong at 04/17/2013 12:12 pm comment

我有煮飯鍵，是否味道與用電飯煲沒分別？

beandogsnow at 04/17/2013 12:22 pm reply

我自已覺得差唔多啦，不過有啲人話好食過電飯煲。

mrschong at 04/17/2013 12:11 pm comment

好多謝你呀! 因為第一次用，又常聽人講要注意安全，因始終有「壓力煲」陰影，所以問下你這經驗人士會安心好多。 如何知道排完氣？我見個「浮子閥」好像沒有上升過...

beandogsnow at 04/17/2013 12:20 pm reply

唔駛客氣，大家交流吓嘛～～ 其實，你可以用塊布放在浮子閥上，輕輕推一推，如果見到有氣出，即仲未排晒氣。切記一定唔可以用手掂呀！！

mrschong at 04/17/2013 10:34 am comment

你好，我叫莊太，我昨天買了「時尚寶」的娥姐煲，即有語音那款，但相信和你買的功能差不多。 我想請教: 煮飯如果按「快速鍵」，是否真的快過電飯煲？是否味道也差不多？ 焗6"蛋糕是否ok？可放矽膠模或不繡鋼模嗎？

beandogsnow at 04/17/2013 10:58 am reply

Hi, 莊太， 除咗「快速鍵」外，有沒有「煮飯」鍵？因為我冇「快速鍵」㗎，所以唔知係唔係同我個煲一樣。不過講到煮飯時間就一定會快過電飯煲。 至於蛋糕，你要唔駛用任何模具，只要幾蛋糕粉攪好倒入內膽按烤焗已經OK。不過如果你試蒸餸，都可以放入只要能受100度高溫嘅盤或模。不過我會自己先放條毛內入去，避免刮花內膽。