清雪櫃嘅時間到喇～～
好玩之處係見到乜就煮乜，
即係話好唔好食都一餐啦～～
拔...我又唔鍾意咁喎，
都想比啲心思煮番好餸比家人食。
先搵下凍格有咩先～
有一包上次去超市買嘅牛尾，
仲有煙肉、紅椒、黃椒、薯仔、紅蘿蔔、洋蔥...
就煮一味紅酒炆牛尾啦。
另外又見有塊豬頸肉（比手板大少少），
可以用黎試下我部T仔嘅其他「分唇」喎...
好，就咁開始啦～～
＊＊我用LC 22cm round 煲＊＊
牛尾先用抺乾，再用鹽和黑椒粉略醃片刻。
跟住撲上麵粉，開火煎至轉色。取出。
見到屋企有咩配菜都可以放入去（例如：西芹、洋惹、紅蘿蔔），炒大約8分鐘至香味出。
唔好意思，有個step我忙記影相，就係炒下啲煙肉條（約4塊）。
加入紅酒約200ml, 滾起後加入茄膏約2湯匙，攪勻。
再加入500ml牛肉湯和Oregano1茶匙，Thyme1茶匙。
加入之前已煎好的牛尾和煙肉和香葉數片，滾一陣。
如果係用煲就慢火炆約2個小時（最好中途熄火焗一陣，再開火炆）至焾。
我就用咗Toshibo焗爐(任何焗爐都得），原煲加蓋用160度焗約2小時。
2小時後...開蓋睇...用針拮下牛尾睇下夠唔夠焾。唔夠可以開細火加蓋再繼續炆多一陣。
如果想啲汁濃啲，可以打開蓋用細火煲到想要嘅杰度。（中途要攪，避免痴底）
送飯一流，改用意粉都正㗎。
可以早一晚煮定，
翌日再heat番做晚餐亦可。
到豬頸肉出場。
我掛住整冇影step， 不過好簡單，
就咁睇字都明。
材料：豬頸肉（比手板大少少），約1.5cm厚
做法：
1. 先用魚露1.5至2湯匙（視乎魚露嘅咸度）、檸檬汁1湯匙、糖1茶匙
醃最少1小時。
2. 入爐前先抹乾豬頸肉，再用T仔嘅過熱水「分唇」200度焗20分鐘。可以用針拮冇血水就可以拿出。
3. 因為要快，我冇自己調汁，改用普通泰式雞醬點豬頸肉食。
又軟又滑又多汁嘅泰式豬頸肉出爐喇～～
歡迎大家上Bullbull自家廚房留言比我～～
沒有留言:
張貼留言